Io ha essite preoccupate a auxlang clarificante le position de interlingua.
Io debe indicar que hodie io ha plus que un cento de messages a leger!
Heri io non legeva mi e-posta proque io esseva preoccupate con esser un
plumbero.  In nostre cocina a nostre nove casa, nos ha habite un problema
con le valvula de aqua calde al lava-plattos in le cocina.  Quando nos
aperi le valvula, on obteni un vibration sonante como un mitraliatrice,
que in le anglese es describite como "air hammering" (le martellar a aere).
Le theoria es que il ha aere in le tubos.  Isto ha crescite recentemente,
e mi sposa esseva ennoiate per illo.  Assi io ha decidite a devenir le
plumbero. Il esseva un projecto que consume le plen die.  Io habeva multo
difficultate in distaccar le connexiones del tubos al vetere gruppo de
valvulas, proque io initialmente non habeva un clave que poteva operar se
in le confinios stricte sub mi lava-plattos. Eventualmente io trovava un
tal clave, un special clave pro obrar sub bassinos.  Totevia, il non esseva
facile a remover le matre vites, proque le corrosion ha fixate los fortemente.
Mais io ha apprendite a perseverer, e lentemente, con probas e errores, io
ha eventualmente removite le tubos e le vetere gruppo de valvulas. Le
installation del nove gruppo esseva relativemente facile.  Il es fortunate
que nos vive solmente 5 minutas de Home Depot, ubi io opina io expendeva
approximatemente $100 in tres visitas, pro obtenir le utensiles e le nove
gruppo de valvulas.

Assi le nove valvulas non produce le sono offensive!  Mi sposa es felice.

Io anque debe mentionar que nos ha habite un rar tempore de nive. Duo
dies post Natal, nos nos eleviava a vider le nive (circa 3 cm.). Su duration
esseva curte. Mais heri de novo nos habeva plus nive.  Il esseva plus un
pulveration de nive que un accumulation super le terra. Le temperatura a hic
es circa -2 a +2 grados de centigrado.

Sia que vos ha un felice e prospere anno nove!

Stan Mulaik