Luca  « Luc » in francese
(e non Lucca como le citate medieval, « Lucques » in francese),

io ha legite in le archivos multe textos de qualitate que tu ha scribite
e tu absentia in le lista postea «tu ha duo vacas » me inquietava.
Il es ben que in Italia on pote scriber liberemente tal critica !

Anque, io ha amate iste texto de Marco Menna (Forsan ille es
un svitio de lingua materne italiane?) :

« Spatial
Secundo le interesses que alicun inter vos exprimeva, forsan un discussion
super le film "2001: Un Odyssea Spatial" de Stanley Kubrick serea
fructuose. Io velle dar un breve introduction, sed io consilia a omnes de
vider lo illes mesme proque il es difficile de exprimer in parolas un
experientia visual e mental.)  i) Le alba del humanitate: on vide un gruppo
de prehominides (alco simile a australopithecos) que vive in un savanna
aride. Le gruppo cerca aqua e nutrimento. Le "clan" combatte contra altere
clans pro le territorio e le nutrimento. Le situation es assatis desolate.
Un matino, un grande monolithe nigre de forma rectangular, perfectemente
polite appare. Le clan es perplexe, sed alicun plus coragioses se approcha
e lo studia. Pauco depost, le monolithe sembla reflecter e irradiar un
signal extraterrestre. Un 'simia' prehominide entra sub le influentia de
iste emanation e discoperi le modo de usar un osso animal como arma. Le
simia deveni intelligente, deveni human (totevia es un intelligentia
destructor, brutal). Illo/ille usa su arma ante contra un tapiro (?),
depost contra simias del altere clans. Le intelligentia/brutalitate
triumpha. ii) Cambiamento de scena: un astronave viagia in le spatio verso
un station orbital. Le spectator del film audi un walzer viennese (le
Danubio blau) e vide un station que resembla al rota gigante del Prater
viennese. Le astronave entra in le station, que es un station
international. Un passagero american, que vole prosequer verso le luna,
incontra un gruppo de scientistas sovietic. On appercipe un sensation de
hostilitate ben que le personas son amabile inter se. Sed le americano non
es franc con le sovieticos: ille sape que on ha trovate sur le luna un
monolithe nigre rectangular, que esseva interrate (inlunate?)
voluntarimente ante multe tempore. Illo es un signo de un civilisation
lunar passate. Le americano atterra sur le luna e visita le monolithe con
alicun astronautas. Dum le astronautas prende photos del monolithe, le
monolithe initia a radiar. Illo reflecte un signal proveniente del
universo. iii) Un mission spatial se dirige verso Jupiter. Cinque
astronautas, del quales tres es hibernate [ponite in un coma artificial], e
un computator intelligente es le equipa. Le duo astronautas active son
juvene homines multe distaccate, scientific, non monstrante nulle emotion.
Le homines non sape le objectivo del mission, solmente le computator, cuje
nomine es HAL, lo sape. HAL controla le integre mission e illo sape parlar.
Etiam illo monstra emotiones como orgolio. Quando le mission es assatis
vicin a Jupiter, le computator face un error. Illo previde que un pecia
technic fallera. Sed le controlos monstra que le pecia es impeccabile. Le
duo astronautas perde le fiducia in HAL. HAL appercipe isto e illo cerca de
occider tote le equipa, interrumpente le fornimento de oxygen. Solmente un
astronauta supervive, Dave Bowman. Ille "occide" HAL disconnectante le. iv)
Bowman, continua le mission. Ille entra in un capsula spatial e se dirige
verso Jupiter. Ille es immergite in un mundo de imagines e colores, in un
ver symphonia visual. Il es quasi impossibile de narrar le impressiones de
iste viage. In le fin del viage, Bowman vide se mesmo in differente phases
del vita. Il es como si Bowman apperciperea le mystero del vita. Quando
ille es un homine ancian, in le puncto de morir, ille vide le monolithe.
Depost, on vide un grande imagine de un feto human in le universo.
Il ha multe factos interessante in iste film. Per exemplo, Bowman occide
HAL, le qual es representate con un singule oculo grande. Isto recorda
Ulysse que occide Polyphemo. Ulysse es 'le Archero' (= Bowman). Un cosa que
poterea interessar Kjell es que le action del film augmenta quando le
homines se approcha al monolithe (= le centro) [le cosas se move in grado
crescente al vicinitate del centro]. Il es remarcabile que HAL sembla plus
human que le homines. In plus il ha le question del intelligentia, del
humanitate, del civilisation, del mystero transcendente. (Pro illes inter
vos qui laborava in le Compania Blau, vos debe provar a mover le nomine HAL
de un littera in avante...) Il me interesserea lo que le
scepticos/agnosticos pensa de iste film. Etc. »

Que deveni Marco ?

Amicalmente,

Jacques