Bon e successose anno nove a vos omnes!

1998 deveniva un anno particular pro interlingua, specialmente vidite ab
Danmark. Le anno comenciava per un donation a interlingua: le
bibliothecas danese establiva proprie categorias pro interlingua in lor
systema de classification decimal, secundo le qual le libros es
arrangiate. Le gruppo 88.92 deveniva "Belletristica in interlingua", le
gruppo 89.082 "Interlingua" (dictionarios, manuales etc.). Antea,
interlingua esseva parte del gruppos 88.94 ("Belletristica in altere
linguas artificial") e 89.84 ("Altere singular linguas artificial"). Le
numero de editiones in interlingua ha crescite tanto que le bibliothecas
danese lo premiava con proprie gruppos - un cosa que le Union Danese pro
Interlingua ha desirate durante plus que dece annos.

Le anno finiva per un altere recognoscimento: Le 10 de decembre le
Nationes Unite celebrava le 50-esime anniversario del Declaration
universal del derectos human per aperir un sito special in Internet con
le declaration in le plus grande numero de linguas, in toto 261, inter
istos interlingua. Ci on anque trova adresses de contacto pro
informationes ulterior super interlingua.

Un grande parte del labor del Union Danese pro Interlingua (DIU) ha 1998
essite "celate" - illo occurreva in Internet. Le pressa danese publicava
multe mentiones de interlingua: litteras ab le lectores, mentiones de
anniversarios, notitias de nove libros etc. Ma Internet assecurava multe
activitates e interessatos active. Le pagina domestic del DIU (hospitate
al adresse http://www.algonet.se/~armann/velkomst.htm) esseva revidite
plure vices pro assecurar le actualitate e qualitate. Le structura
chaotic de Internet face multes trovar interlingua per hasardo al
numerose paginas accessibile. Isto significa plus de requestas que
normalmente ab interessatos, e isto significa interessatos plus active,
pois que Internet require un certe activitate - p.ex. per scriber un
e-posta. Le contacto directe e rapide crea interesse e enthusiasmo. Le
nove interessatos compra plus de magazines e libros e deveni plus
rapidemente membros del organisationes de interlingua. DIU mesmo
obteneva membros in le nord del Norvegia del nord!

In 1998, DIU inviava a omne su membros un questionario pro saper si le
membros es contente, si illes ha critica del labor del organisation, si
illes ha bon ideas pro futur campanias, como illes judica le contento e
frequentia de Actualitates e Panorama, e si illes desira participar
activemente in le labor del DIU. Le responsa esseva positive: le membros
esseva contente, e plure ideas a nove initiativas e cambios arrivava.

Durante 1998, le 16 europarlamentarios danese e le commissario danese in
le Union Europee ha recipite omne editiones de Panorama e Actualitates,
cata vice accompaniate per un littera personal. Le contactos inter le
europarlamentarios, le commissario e le DIU es positive.

Plus de museos danese ha elaborate versiones in interlingua de lor
brochures pro le publico. Ancora altere museos considera le offerta.

Le evento nordic del anno esseva naturalmente le 6-te incontro nordic de
interlingua in Helsingborg, Svedia, in un fin de septimana in julio.
Quatro dies antea esseva fundate le Association Finlandese pro
Interlingua (SILY), e omne participantes ab Danmark, Svedia e Norvegia
incontrava durante le incontro le presidente e su sposa. Un eminente
collaboration e bon coordination inter le quatro organisationes nordic
es le resultato del incontro que anque elaborava un plano de labor con
multissime initiativas pro le singule pais e in actiones commun.

Le redactiones in chef de Panorama e de Actualitates es colligite in
Danmark. Le collaboration con le contributores ab tote le mundo require
multe labor ma es un placer. Actualitates entra in 1999 in su 40-esime
anno; celebrationes venira! (On pote participar in le celebrationes per
comprar un abonamento per contactar le tresorero del DIU, Levi Pedersen
- reguarda le pagina domestic del DIU.)

In 1999, DIU spera aperir su proprie sito in Internet. Le adresse
www.interlingua.dk ja ha essite comprate. Le servicio electronic pro le
massa crescente de requestas debe developpar se sempre.

Le traditional vesperes de interlingua in Copenhagen - le ultime martedi
de cata mense - ha continuate sin interruption pro octo annos e
continuara in 1999. Le prime vice es le 26 de januario a 19-21 horas.

Le labor con le revision - e un forte allargamento - del dictionarios
danese de interlingua continua. Ancora plus de librerias debe vender
litteratura in interlingua. Actualitates e Panorama debe haber plus de
lectores. Ancora plus de organisationes, museos, firmas etc. debe haber
versiones in interlingua de lor materiales public. DIU debe haber plus
de membros. E le grande projecto de colliger le historia de interlingua
pro le 50-esime anniversario in 2001 debe materialisar se; le redaction
concrete comenciara in un collaboration danese-svedese.

1999 essera le ultime chance de iste seculo - si, mesmo de iste
millennio - pro facer un effortio pro interlingua. Memora isto - e face
qualcosa, per favor. E trova al minus duo (2) nove membros in 1999; isto
non es un carga difficile. Pro le optimes, trova in ultra duo (2) nove
abonatos a Panorama - e assecura mesme que le bibliotheca local obtene
sempre un abonamento a Panorama, per pagar lo mesme o per parlar ben e
facer le bibliotheca pagar lo mesme.

Le prime occasion es le Die de Interlingua, venerdi le 15 de januario.
Isto es le octave vice que on mundialmente celebra le apparition del
"Interlingua-English Dictionary" como le prime obra in interlingua a
exactemente iste die in 1951. Le idea es que omnes debe facer qualcosa
pro interlingua a iste die; multe parve initiativas face un riviera...
Face un exposition al domo cultural local, al bibliotheca, pone
materiales informative in le bibliothecas, in le salas a attender del
medico e dentista, arrangia un vespere commode con interlinguistas ab le
vicinitate, presenta un discurso public super interlingua, scribe
litteras al jornal local super interlingua, usa le septimana in le qual
es le Die de Interlingua pro cata die apprender un nove lection del
lingua o apprende cata die dece nove parolas. Le possibilitates es
legio.

Adjuta omnes a facer 1999 un anno vermente active pro interlingua.
Comencia per renovar le abonamento/membrato - e memora que un abonamento
duple de Panorama (cata vice on recipe tres exemplares pro uso
informative) costa solmente 40 NLG, e un abonamento triple (cinque
exemplares) solmente 60 NLG.

A omne vos actives: Io gaude a audir ab vos con novas super interlingua
- parvissime, grandissime o normalissime.

Un vermente bon, active e successose Anno Nove - a vos e a interlingua!

Con mi optime salutes

Thomas Breinstrup
secretario del Union Danese pro Interlingua