[Anque inviate a news:europa.linguas e news:europa.musica]

Io es non solmente un amator de linguas (vide mi signatura), ma
anque de musica. Io ha un affection particular pro musica de
Africa del Nord e de Medie Oriente, de Mali a India. Io ama le
fusion de musica egyptian con 'dance' moderne occidental, como
Natacha Atlas, un fusion de acustic traditional con electronic.
O Talvin Singh, qui face un fusion de musica indian con
electronic moderne. Ma io ama anque le musica plus traditional,
como Habib Koité, un cantator e guitarrista de Mali, o Baaba
Maal de Senegal. Habib Koité es mi discoperta le plus recente.
Su musica es acustic e contemporanee, basate in tradition.

Re le linguas: io non comprende nihil del texto de isto musica.
Esque mi ignorantia de illo linguas face me amar isto musica
plus? Non distrahite del musica per le texto? Qual es le
function de texto in mi appreciation de musica? Il mi sembla que
io pote appreciar plus le sono del voce, del lingua, del canto,
si io non es distrahite per le parolas (sin parlar del contento
mesme del texto). Cognoscentia de un lingua me impedi de audir
le sono pur de isto lingua.

Un altere possibilitate serea que illo musica de Africa del Nord
e de Medie Oriente es simplemente plus interessante que le
musica moderne occidental.

[Vole ben rectificar errores grammatical.]

--
Peter Kleiweg [nl,en,ia(,af,de,da,no,sv,fr,it)]
http://www.let.rug.nl/~kleiweg/