...qui le 21 de decembre ha recipite como presente de Natal lor
filia Ruxandra, io exprime mi calide felicitationes!

Io debe dicer que, in julio 2002, Ruxandra habera un amichetto o
amichetta brasilian plus juvene. :-)

Si, mi sposa Rosana es gravide e io ha comprate a illa un libro que
explica le phases de disveloppamento del baby.

E il ha iste textetto interessante que io traduce pro Florin e que
io debe memorizar equalmente! :-)

==================================================================
LE DECE COMMANDAMENTOS DEL JUVENE PATRE

Tu non aperira jammais un porta con violentia: ultra illo il pote
haber un hominetto quattate.

Tu meditara tote tu gestos e continera multes de tu impulsos. Minus
ardor e plus fortia.

Tu videra minus frequentemente le celo: tu necessitara reguardar,
sin cessar, a tu pedes pro non calcar super tu hominettos.

Tu non claudera jammais le tiratorios con un pulsata de geniculo:
le manettos es in tote parte. Tu facera tote le cosas lentemente,
cautemente.

Tu non dormira jammais plus a somno libere; tu sera sempre attente
al minor suspiro. Tu non potera audir un crito, sin interrogar te,
con le corde afflicte, si illo non es le crito... le crito que tu
timera tote tu vita.

Tu non accendera jammais un foco sin pensar que le foco combure. Tu
non ponera jammais plus tu cuppa de the al bordo del tabula. Tu
extinguera tu cigarrettas con un attention particular.

Tu habera verso tu objectos fragile un affection minus zelose. Tu
renunciara a collectionar, salvo in secreto, le vasos de crystallo
e le porcellanas delicate. Tu dara al pipas de argilla un adeo,
forsan eterne.

Tu non committera jammais plus un gluttoneria sin pensar a certe
bucchettas que equalmente ama gluttonerias.

Tu ponera le silentio diurne in le numero del cosas accidental,
quasi mystic.

Tu non dicera jammais plus con le superbe arrogantia de
anteriormente: "In tal die io facera tal cosa". Tu includera un
"forsan" super le alas de tote tu projectos.

Il es assi, e tu debera resignar te.
==================================================================

Vita longe a Ruxandra!
Congratulationes al nove parentes!

A revider,
Ensjo.