¡VIVA EL SAMBA!
Citate argentin copia le Carneval brasilian

Viste de foras, le bon pigritia de Bahia e le batte-tamburo de Rio non 
combina con ille aer europee que le argentinos ama exhibir. Quando illes 
vole balanciar le culo, illes ha le costume de invader nostre plagias in 
cerca de un genuin _rota de samba_, in le qual illes pote render se al 
attractivos de un vita tropical. Illo ora cambia, perque le argentinos ha 
create lor proprie Carneval. Le scena del novitate es un citate parve, ma 
con un animo de causar invidia. Gualeguaychú, in le provincia de Entre 
Ríos, a 220 kilometros de Buenos Aires, ha devenite le grande successo 
carnevalesc in un pais ubi le periodo de _follia_ non mesmo es feriato. A 
cata anno, le citate attrahe milles de touristas (90% del provincia del 
Buenos Aires) con un Carneval assumitemente inspirate in le brasilian.

Ultra le animation, le festa ha adresse proprie desde 1997. Le 
"corsodromo", le _sambodromo_ local, ha essite installate in un station 
ferroviari abandonate con capacitate pro 35.000 personas, plus que le 
medietate del population local. Como in certe regiones de Brasil, le 
Carneval non se restringe a quatro dies: illo comencia in 15 de januario e 
se repete tote le fines de septimana usque martio. In 1999, le citate ha 
recipite 300.000 visitantes pro le festa, numero que se previde augmentar 
25% iste anno, gratias al exhibition per le television. Le economia local 
regratia. Le sexanta hoteles e pensiones ha restate incombrate durante duo 
menses. Le Carneval del anno passate ha injectate 25 milliones de dollares 
in le municipio, lo que ha facite le vicin Gualeguay crear su proprie 
Carneval pro competer con Gualeguaychú. Le festa ha torquite mesmo le 
conservatorismo del campania argentin: necuno plus se incommoda con le 
exigue vestimentos del disinhibite _follionas_.

Existe mesmo un vocabulario proprie. le _scholas de samba_ se appella 
"comparsas", le _batteria_ es "batucada", ma le _passistas_ es "passistas" 
mesmo. Il ha mesmo _porta-bandieras_ e le _ala del bahianas_. In grandor, 
le Carneval de Argentina ancora es minuscule proxime al brasilian. Cata 
schola ha solo 250 integrantes, con circa cinquanta musicos. Ma il ja ha 
habite progresso. Annos retro, practicamente il non habeva _carros 
allegoric_, e hodie cata schola ha al minus quatro, in media con 13 metros 
de altor. "Es hallucinante. Io me senti como si io serea in le 
_Sambodromo_ de Rio", se commove le vedetta Yuyito González.

Con le typic facie del integration promovite per le Mercosud, le 
exportation del _follia_ non se restringe a Argentina. Le batte-tamburo in 
espaniol cresce in Chile, ubi, in le ultime electiones, tanto le 
pinochetistas como le victoriose centro-sinistra ha utilizate gruppos de 
percussion in lor assembleas. Le chilenos tamben ja se organiza in scholas 
de samba, con le suggestive nomines de "Camaleon", "Sapor Brasil" o "_Axé_ 
del Luce". Le uruguayos es alteres qui vole probar que illes ha multe foco 
e _samba in le pede_, con un renascentia del traditional _bloccos_, o 
"murgas", in le stratas de Montevidéo. Apparentemente, le Mercosud ha 
ultrapassate le phase del simple commercio e ja ha attingite le stadio de 
_samba in le pede_.
____

Raul Juste Lores, de Buenos Aires.

(Revista "Veja", Casa editorial "Abril", edition 1639, anno 33, nº 10, 8 
de martio de 2000, pag. 47.)

Traducite per Ensjo.