Post leger le version de Martijn, io ha trovate multe punctos de su
traduction que me ha placite plus que mi prime hastive tentativa. Io ora
emitte un altere version ubi io ha miscite ambe traductiones e corrigite
alcun errores.
http://www.kauppi.net/mina-puheita_yk.htm
Secretario General Sr. Kofi Annan,
Commissario Vitorino,
Sra. Simone Veil,
distinguite invitatos,
Senioras e Seniores,
Io non pote exprimer lo quanto io apprecia le possibilitate de adressar
iste celebration historic del qual nos totes ha le opportunitate de
participar hodie.
Io es tamben multo honorate per le invitation del Commission Europee pro
representar le Parlamento Europee in iste evento.
In le periodo del eliminatorias del NBA, io pote contar vos que, ora
mesmo, io me senti como un ver novicio. Stante hic in le tribuna pro le
primissime vice ante un audientia consistente de tantes de mi idolos
politic.
Io me effortiara al maximo pro dar vos un idea del perception de Europa e
del Union Europee del perspectiva de un membro recentemente eligite del
Parlamento Europee.
-----------------------------------
Le fundation del identitate Europee
-----------------------------------
Per medie seculo, le Union Europee se ha ingagiate al ideas de pace,
stabilitate e prosperitate. Non solmente pro citatanos europee ma tamben
pro le societate human global como un toto.
Robert Schuman ha dicite: "Europa non sera facite subitemente, o conforme
a un unic plano. Illo sera construite per medio de realisationes practic
que primo creara le solidarietate de facto." Iste disveloppamento,
impulsionate per grande leaders europee, continua ancora hodie.
Como agentes politic de hodie, nos debe reguardar nos como parte de un
longe catena de homines e feminas de stato illuminate e sensate qui
individualmente ha apportate le integration a nove nivellos e lo ha date
su substantia.
---------------------------
Le defias del globalisation
---------------------------
Totes admitte que le stato national es frequentemente un unitate troppo
parve pro resolver grande problemas. E qual es le grande problemas? Hodie
illos non es solmente national o continental, ma sempre plus global.
Le globalisation es hic, mesmo si nos lo vole o non. Desde que barcas ha
navigate le mares, messages ha essite livrate, nove continentes ha essite
trovate e le commercio se ha expandite, le mundo ha devenite sempre minor.
Le arena del horologio cade in un sol direction. E le velocitate augmenta
sempre.
Totes vole crear plus prosperitate e plus ben-esser pro le mundo. Nos pote
discordar super le methodos pro attinger iste objectivo o super como
divider le ben-esser, ma le objectivo fundamental remane le mesme.
Io crede que un economia mundial aperte e salubre es le melior via a plus
elevate standards de vita pro le personas de tote le partes. Naturalmente
nos debe adjutar le personas prejudicate per le cambiamento, ma nos non va
adjutar les obstruente le mercato unic o sabotante le negotiationes del
OMC.
------------------------------------
Le reaction europee al globalisation
------------------------------------
Le Union Europee pote esser reguardate como un ponte inter le nivellos
national e global. Europa debe reager al globalisation assumente un
leaderantia forte, in le qual le principio-guida debe esser le
concentration del Union super labores que exige effortios conjuncte.
Pro listar un poco de iste defias: nostre securitate commun; meliorationes
economic e avantiamento del agenda del OMC; maestramento del revolution
informatic; menacias ambiental; aspectos sanitari; et cetera.
Per correspondentia, le Union Europee non deberea sub qualcunque
circumstantias interferer con materias del quales se tracta melior a
nivello statal o local. Le principio de subsidiarietate debe esser sempre
appreciate. Le diversitate cultural es nostre fortia e un opportunitate.
Le Union Europee debe esser un associato pro le personas qui prende
decisiones localmente, un alliato qui pote e va adjutar si necessari.
Le rapide disveloppamento del mundo non permittera que Europa remanera
immobile. Le globalisation, le continue liberalisation del commercio
mundial, assi como nove crises ha ponite e va continuar a poner al proba
le capacitate operative del Union.
In reformar le Union Europee nos debe attinger un equilibrio juste. Non
solmente inter institutiones ma tamben inter Statos-Membros minor e major.
Le operabilitate del Union es mesmo plus importante pro le parve nationes
como mi patria, Finlandia.
In addition al effectivitate e al democratia, in reformar le processo
decisive e le administration del Union nos debe insister super le apertura
e le responsabilitate a fin de augmentar le confidentia del citatanos.
Le expansion al est es un altere processo que non deberea esser
interrumpite. Le UE deberea remaner aperte a tote le paises europee
ingagiate al valores de economia de mercato, democratia e derectos human.
-----------------------------------------------
Le Union Europee e su rolo in le Nationes Unite
-----------------------------------------------
Malgrado le facto que nos certemente ha meliorate multo in cinquanta
annos, a vices nos debe recordar nos que iste cerca europee pro su rolo in
le dialogo global es ancora assatis juvene e es sub constante evolution.
Le integration initiate in le campo economic non pote plus depender
solmente de solutiones interne. Mesmo si nos ancora debe travaliar con le
mercato unic, simultaneemente le Union
Europee debe aperir se al mundo e assumer su responsabilitates global.
A fin de satisfacer ille responsabilitates, le Union debe cooperar con le
structuras create e con le organisationes existente e profitar del
experientia ganiate in le Nationes Unite. Per medio de un approche
integrate nos es plus potente pro eradicar le povressa, assecurar le
derectos human, crear empleos e facer le economina global e le structuras
international plus sensibile al necessitates basic de tote le esseres
human.
Le rolo del NU se ha disveloppate durante le decadas post le guerra.
Le patres fundatores del NU voleva crear un institution que poterea dar
solutiones a problemas global.
Ma illes non confideva bastante a lo que illes habeva create pro dar lo
poteres independente e instrumentos pro prender decisiones
efficientemente.
Assi, le Nationes Unite es tanto forte quanto su agentes. E le agentes non
es plus purmente le Statos-Nationes, ma bloccos regional e politic, inter
le quales le Union Europee es un del plus potente.
Le Union Europee debe esser un associato forte del Nationes Unite.
Malgrado su debilitates, contra le quales tote le organisationes
international debe luctar, le Nationes Unite ancora es _le_ institution,
que forma le base del cooperation global, coordina projectos de
governantia
global e promove pace e intendimento inter nationes.
Le precondition pro solutiones global es le capacitate del nationes
individual de abdicar a lor preferentias egoistic. Alcun valores universal
deberea superar le valores definite conforme a interesses national. Isto
es difficile intra le Union Europee si tote le Statos-Membros se prende al
optiones que melior servi a lor proprie interesses.
Le mesmo se applica al processo de integration europee in relation a
tertie nationes. Le interesse commun del citatanos europee es le
disveloppamento equilibrate e le progresso in un nivello international,
non solmente le progresso attingite intra le Union.
Per iste ration nos ha necessitate desperatemente, e va necessitar, de
organisationes international que prende le responsabilitate global in vice
de concentrar se super interesses national o regional.
Le Nationes Unite es le foro pro cercar le equilibrio inter varie
interesses e le foro pro negotiar le solutiones commun. Interesses
divergente inter le nationes continua a exister ma nos non deberea jammais
lassar los crescer al puncto que le nationes necessitarea levar armas le
unes contra le alteres.
-------------------
Le modello europee?
-------------------
In le Nationes Unite, le Union Europee deberea promover le modo europee de
pensar, le "modello europee" como le Presidente Prodi lo ha exprimite.
Con iste modello, de accordo con Prodi, nos es capace de integrar un
efficiente economia de mercato con le ideologia de ben-esser social.
Le unic problema es que iste modello ancora non existe.
In multe aspectos, le Union Europee non es tanto efficiente quanto illo
deberea esser. E le systemas de ben-esser social que pote haber essite
progressive in le decada de 1970 non es plus adequate al economia global
de hodie. Simple, illos non es sufficientemente flexibile.
Ma ora, post le Summitate de Lisbona, nos es in le limine de trovar le ver
tertie via. Io es certe que es possibile crear un modello basate super le
economia de mercato que es economicamente efficiente e socialmente juste.
Le economia de mercato es le systema que nos forni le plus adequate
mechanismos pro maestrar le societates moderne. Non le economia de mercato
_laissez-faire_, ma uno plus controlate.
Le economia de mercato controlate deberea esser le instrumento a usar
tamben in le paises in via de disveloppamento quando nos tenta diminuer le
povressa, meliorar le conditiones de vita, sanitate e derectos human pro
le tertie mundo, evitar le "segregation digital" e dar a tote le esseres
human le possibilitate de viver lor vitas in pace.
-------------------------------
Le societate informatic e civic
-------------------------------
Le proxime generation ha un grande avantage super su predecessores: le
informatica e le nove e plus efficiente medios de communication. Nos
frequentemente audi personas parlar super le morte del distantias e le
morte del localisation. Isto es exactemente lo que illo representa.
Le recente innovationes technologic es de poc adjuta, non importa quanto
avantiate illos es, si le personas non succede a mantener le pace.
Consequentemente, duo dimensiones de apprentissage es essential. Primo, le
personas qui disveloppa technologias deberea apprender a resolver le
problemas basate super le necessitates del vita quotidian. Secundo, il es
le utilisatores final qui debe apprender como illes pote profitar del
technologia moderne, e como illo pote facer le cosas plus facile in lor
vitas quotidian.
Pro transformar isto in realitate, nostre systemas educational debe
inseniar a totes le habilitates basic necessari in le societate
informatic. Tamben, nostre studiantes debe esser incoragiate a innovar e
crear nove technologias pro le beneficio del proxime generation.
Le brave nove economia tamben apporta defias. Toto va evenir plus rapido e
le politicos ancora es tanto lente quanto illes ha sempre essite pro
comprender, adoptar e travaliar conforme nove ideas. Le inertia del
processo decisive politic cresce e cresce usque que nos debe admitter que
il es in veritate nostre ressources human que restringe le
disveloppamento.
--------------------------------------------------------------
Le education como un base pro le disveloppamento e le successo
--------------------------------------------------------------
Solmente fortificante nostre ressources human nos pote promover
disveloppamento sustenibile economic, social e cultural. Le equalitate de
opportunitates es le fundation de un economia de mercato salubre.
Illo significa per exemplo le derecto de cata infante a reciper un
education basic e haber le opportunitate de poter progreder a nivellos
plus alte de education malgrado le stato social o le racia del studiante.
Le augmento de capacitates e habilitates per medio del education es un
prerequisito fundamental pro le successo del activitate interprenditorial
e del creation de empleos. Education e recerca es le fundationes de nove
innovationes, ben-esser e crescimento intellectual.
Nos debe canalisar ressources verso le creation de un ambiente favorabile
al innovation e al disveloppamento de un societate del cognoscentia. Nos
debe incoragiar personas a facer le melior uso de lor capacitates e usar
lor ideas e habilitates pro le beneficio del mundo como un toto.
Le equalitate de opportunitates in le campo del education tamben apporta
le melior talentos individual a servir le societate e a auxiliar illes qui
es minus fortunate e qui non succede a arrangiar se in le societate per se
mesmes.
--------------------------------------------
In cerca de equilibrio, responsas e veritate
--------------------------------------------
Goethe ha scripte multe tempore retro:
"Non sonia sonios parve perque istes non ha poter pro mover le cordes del
homines."
E il es le cordes del citatanos que nos debe calefacer pro crear un futuro
plus brillante pro nos totes. Io es certe que, sin sonios commun e sin le
forte credentia que nos pote e va de facto realisar nostre sonios, nos non
ha motivos pro continuar iste travalio.
Senioras e Seniores,
Le Union Europee es un projecto progressive, durante que illo continua a
tentar equilibrar le interesses del parves e del grandes, inter le nord e
le sud, e inter le prosperes e le minus fortunates.
Uno ha dicite que le globalisation puni le pauperes e recompensa le
riccos. Isto pote esser veritate, ma solmente si le communitate politic
global es incapace de trovar le contrabalancia pro le globalisation
economic.
Vetule receptas politic non pote dar nos le responsas.
Le governantia mundial non es decidite per nos presente a iste evento.
Illo non es decidite in institutiones politic. Illo es decidite per
generationes, qui structura lor perceptiones del mundo per medio del
television e del communicationes via computator.
Il es per isto que io vole finir mi discurso con le lingua que iste
generation intende e in le qual illo communica.
Le sapientia se origina del Agente Fox Mulder del X-files:
"Frequentemente le sonios es responsas pro questiones que nos ancora non ha
discoperte pro questionar. Necuno detene jurisdiction super le veritate.
Le veritate ancora es la foras."
E illo solo pote esser trovate in cooperation con alteres.
Piia Noora-Kauppi
Finlandia
Membro del Parlamento Europee
|
