Gratias a Deo, mi sagesse in Bursa non ha venite a posteriori, nam io habeva
vendite toto ante le cadita. Ma io pensa al naivos qui ha credite le
consilios del pseudo-specialistas e nunc son ruinate.

Tamen un phrase de Mario Malaguti me face reflexionar: "Le Bursa non pare
esser le puncto de incontro del homines sage in le senso commun del
judicio". Infelicemente nos non vive in insulos deserte et nos debe
affrontar le realitates de iste mundo. Per exemplo, io sapeva que post mi
emeritato io reciperea minus de moneta que dum mi tempore de activate: que
io debeva facer? Subscriber un assecurantia pro reciper un renta
supplementar o acquerer a credito un appartamento calculante le
reimbursamentos pro que illos cessa le die de mi sexantesime anniversario?
In ambe casos io debeva eliger. In le Bursa on non face un altere cosa.

Un de mi grangranpatre era un homine seriose qui non voleva riscar su moneta
in le Bursa. Ille subscribeva dunque un valor de plus que 100.000 € actual
in le obligationes del governamento russe. Recentemente io ha recipite 1.000
€ que io ha date a un neptia qui les besoniava. Forsan, si ille habeva
mettite su moneta in le Bursa su descendentes serea nunc plus ric.

Mi conclusion sera: in omne affaire obei de preferentia a tu intuition de
profano e non al consilios de un specialista qui pote ganiar moneta in
trompar te.

Bernard Aunis

P.S. : "Refliger" es in IED, "Reflexionar" serea comprendite ubique. Secundo
vos, cual del duo es plus international?