In 1965 io esseva un locotenante in le reservas del armea, e habente
obtenite mi Ph.D. in le psychologia, io ha transferite me de
un unitate del artilleria a un unitate de recerca e disveloppamento,
e io ha obtenite un designation de mobilization al Pentagon in
Washington, si le guerra errumpe.

In nostre unitate nos habeva multe personas professional. De facto
mi professor sub le que io ha obtenite mi diploma doctoral esseva
un colonnello e un membro del unitate, e ille es le un a que io
es indebite pro le fortuna de entrar iste unitate.

Cata un esseva responsabile pro presentar un o plure horas del
instruction, e in nostre unitate il habeva un altere colonnello, qui
esseva le chef de sanitation del stato de Utah. Le subjectos de
instruction esseva super le activitates del profession del presentator.
Un vespere ille ha recontate le sequente:

In le guerra mundial II ille esseva un officiero, un bacteriologo,
e un die ille ha recipite ordines a proceder al Insulas de Hawaii
pro plus ordines super un mission altissimemente secrete.

Quando ille ha arrivate in Hawaii, ille jungeva altere bacteriologos
del armea, e insimul illes se imbarcava in un C-47 aeroplano de cargo
que esseva plen de barriles de 50 gallones de un substantia secrete.
Lor aeroplano partiva Hawaii a transverso le pacifico a un insula
a que le armea del Statos Unite occupava un latere del insula e le
japonese le altere.

A lor arrivata, le secreto del substantia in le barriles esseva
revelate.  Illos contineva un pulvere de un nove chimica, le DDT.
(Le germanos vermente esseva le original inventores). Isto esseva
un nove insecticidio. E le ration proque illes ha venite al insula
con le DDT in total secretessa esseva que il habeva un epidemico
del dengue in le insula.  Si le japonese, qui habeva occupate le
insula pro plure annos discoperiva que iste maladia ha facite
non functional un grande parte del armea american, illes attaccarea
les e fortiarea les del insula.  Il esseva necesse de eliminar le
mosquitos del insula, proque illos porta le organismo del dengue.
Le japonese esseva  jam immune al dengue per haber sufferite lo
durante lor occupation.  Il esseva essential a compler iste
mission tanto rapidemente como possibile.

Assi aeroplanos esseva equipate con apparatos pro disperger le
DDT, e illes volava super le jungla del insula, emittente le
DDT.

In le fin toto esseva salvate. Le epidemico del dengue esseva
stoppate. Le soldatos american ha recuperate se e ha attaccate e
vincite le japonese.

Le maladias ha frequentemente causate le defaite de armeas in le
historia. Alcunos pensa que Alexander le Grande esseva occidite
per le Virus de West Nilo, portate per un mosquito post que su
immunitate ha devenite debile a causa del infection de un vulnere
de battalia.  Le pestilentia esseva un frequente causa del morte de
milles in citates assediate.

In pestilentia perder! In vincer le pestilentia, vince le inimicos!

Cordialmente,
Stan Mulaik