NUNTII LATINI
1997 MAIO 29

RUSSIA ET NATO COOPERANTUR

Russia cum Consociatione Atlantica NATO
documento fundamentali de cooperatione,
securitate et relationibus mutuis subsripsit.

Caerimoniae Parisiis actae interfuerunt
praesidens Russiae Boris Jeltsin et
moderatores sedecim civitatum, inter eos
Bill Clinton, praesidens Civitatum Americae
Unitarum.

Praesidens Francogalliae Jacques Chirac,
hospes conventus, dixit illo tractatu
historico effici, ut novus in Europa post
bellum alterum mundanum in duas partes
divisa tandem redintegraretur.

KHATAMI PRAESIDENS IRANIAE

Novus praesidens Iraniae electus est
Mohammed Khatami, quippe qui electionibus
praesidentialibus nuper factis de
antagonista suo conservativo Ali Akbar
Nateq-Nuri victoriam manifestam reportaret.

Eventus suffragiorum pro acerba clade
regiminis Iraniae theocratici habetur,
cum Khatami, vir politicus liberalista
et pristinus minister culturalis,
renovationibus politicis favere cognoscatur.

JUPPE MUNUS DEPOSITURUS EST

Alain Juppe, primus minister Francogalliae,
nuntiavit se septimana proxima munus
depositurum esse.

Causa abdicationis videtur esse, quod
partes Fracogalliae administratrices de
primo suffragio comitiorum parlamentarium
inferiores discesserunt.

Monuit Juppe rei publicae novo ministro
opus esse, utcumque secundum suffragium
die Dominico proximo eventurum esset.

DUO FINNI ACADEMICI AMERICANI

Duo viri docti Finni socii Academiae Scientiarum
Civitatum Americae Unitarum cooptati sunt.

Unus eorum est professor investigator Albert de la
Chapelle, vir de genologia optime meritas, qui
inter alia carcinogenesim et morbos hereditarios
examinavit.

Alter est professor Kai Simons, cuius provincia
specialis est cytobiologia.

In illam academiam celeberrimam quotannis
ad summum quindecim nova membra peregrina
accipiuntur.

MAIOR PRODUCTIO AURI IN FINNIA

Productio auti in Finnia anno proximo
praeterito usque ad tres tonnas crevit,
cum ille proventus anno superiore tantum
unius tonnae et quadringentorum
chiliogrammatum fuisset.

Quod incrementum ex novis aurifodinis
in diversis Finniae regionibus usu
receptis ortum est.

Etiam aurileguli adhuc frequentiores in
Lapponiam venerunt, ut ex fluviis eius
auriferis arenam aurosam haurirent.

QUID VEIKKA GUSTAFSSON FECERIT

Veikka Gustafsson primus Finnus est, cui
contigit, ut culmen Montis Everestii sine
auxilio oxygenii subsidiarii ascenderet.

Numerus oribatarum, qui tantam rem gesserunt,
in orbe terrarum minus quinquaginta est.

Gustafsson, postquam in summo monte dimidiam
fere horam mansit, caute in castra inferiora
descendere coepit, ne ex gelido vento et
frigore quadraginta graduum Celsianorum
moreretur.

VIRIBUS UNITIS
CONDICIO SINE QUA NON
AURI SACRA FAMES

Nuntios Latinos 29.5.1997 collegit et
redegit Reijo Pitka"ranta.

(Per Allan Kiviaho)