Gratias Ensjo pro le informationes super le usage de infinitivos e lor
prepositiones accompaniante.

Io suppone que vos non jammais ha le nive o le grandine in Belem.
Un BLIZZARD es un forte tempesta de nive con multe vento. Io suppone que
nostre amicos Svedese pote describer los in detalio. Nos ha pauc "blizzard"
hic in Atlanta--io dice "pauc", solmente a indicar que nos a vices
ha illos. Io rememora le pejor tempesta de nive e vento justo in 1993
(io crede), in april, imagine, con tornados! Nos habeva circa .3 metros
de nive in 24 horas. Multe arbores cadite. E le citate de Atlanta
se arresteva (il non require multe nive pro facer isto in Atlanta, proque
nos ha practicamente necun machinas pro remover le nive). In le
montanias al nord de Atlanta il habeva un tornado que removeva le
arbores del latere de un montania. Un tempesta mal.

Si, le grandine pote occider vos si illo cade in le magnitude de
bollas de tennis o mesmo de golf. Le petras de grandine in iste magnitude
es rar, mais ancora periculose. Illo lassa le indentationes in automobiles.
E il es possible haber tal grandine in le estate quando le temperatura es
presso 30 C. Il require un grande gradiente del temperatura in un tempesta,
que crea grande ventos que porta le caditas de pluvio a grande altitude,
ubi le aere es frigide, e le caditas de pluvio se congela, cade, cape
plus aqua super lor superfacies, e es portate de novo per le vento ubi
le nove aqua se congela al petra de grandine, augmentante lo. Iste
processo se repete usque le peso del petra de glacie es troppo pro le
vento a portar, alora le petra cade al sol.  Le grandine es plus commun
in le estate que in le hiberno.

Stan Mulaik