Essente un devoto de computatores de Apple desde lor inception, io ora
lege cata die con anxietate le confusion de direction al plus alte nivellos
al Compania de Apple. Lor executive in chef Gil Amelio ha essite fortiate a
resignar justo quando le nove systema de operation OS8 es presentate al
publico. Duo membros del Consilio de Directores ha resignate se, lassante
solmente tres membros, con Steve Jobs, un executive in chef plure annos
retro, in un position dominante. (Ille anque ha essite fortiate a resignar
post esser un del fundatores del compania, proque ille non esseva tanto
flexibile in disveloppar le Macintosh computator--mais como un fundator, ille
possede multo certificatos de action, que face possibile su inclusion in
le Consilio de Directores del compania. Le ironia es que Dr. Gil Amelio ha
cercate su aviso, quando le compania Apple ha comprate le compania NEXT de
Steve Jobs pro obtener su systema de operation Nextstep, pro usar lo in le
disveloppamento del proxime version del systema de operation. Inter tanto
Steve Jobs ha subminate (in mi opinion) le position de Dr. Amelio, e le
periculo es que Jobs va reorientar le disveloppamento del systema de
operation secundo le systema de Nextstep e abandonar le interfacie del
Macintosh tanto familiar a milliones de usatores de computatores Macintosh.
Isto es mi anxietate. Le operationes internal del systema de operation
pote esser Nextstep, mais le interfacie con le usator debe retener le
characteristicas familiar, si le transition a iste nove systema pote passar
lisiemente, retenente le appoio del milliones de usatores del Macintosh.
Intertanto, in despecto le critica de Dr. Amelio que ille mancava le
energia e dynamismo, le charismo, le sapientia del mercato, ille lassava
le compania Apple in bon condition, con un reducite personal, clar
objectos a attinger, un bon revision del systema de operation in OS8
(que tote le revistas dice es excellente), nove computatores que es ancora
superior al Pentium computatores in rapiditate (325 Hz) in tests comparative.
Ille esseva flexibile in su negotiationes con le companias fabricante
clones del Macintosh computator super le costo a illes del systema de
operation Macintosh. Ora Steve Jobs es reversante le curso del negotiationes,
arguente que le fabricantes de clones debe pagar un plus grande precio pro
le systema de opertation, si illes competi con le compania Apple al
nivello de computatores plus costose, que companias como PowerComputing ha
facite, in loco de fabricar computatores al nivello basse pro le massas.
E in un certe senso isto es rationabile proque iste companias de clones non
ha le alte costos del disveloppamento del computatores, quando Apple
designa le nove circuitos de lor computatores basate super le Power PC
chip. Proque Apple non ha le mercatos de Microsoft pro recuprir le costos
del disveloppamento del systemas de operation, illes debe pagar pro iste
disveloppamento del venditas de computatores Macintosh, e si illes non
taxava le venditas de computatores pro isto, lor systema de operation
costarea $400 in loco de $99. Totevia le negotiationes de iste questiones
debe esser delicate--non pro le periculo de alienar le companias fabricante
le clones, mais non pro alienar le publico per parer dictatorial e
inflexibile, post le apparentia que le Compania Apple ha acceptate le
aviso a expander le uso de lor systema de operation a altere fabricantes
pro remaner competitive con le coomputatores basate super le systemas de
Microsoft. Il es un affaire de relationes public. Assi iste dies porta
multe anxietate super le curso del Macintosh, que ancora ha le plus
devotate adherentes de alicun systema de operation.  Le problema es que
le Consilio de Directores de Apple Computator non ha essite le plus
sapiente, facente mal selectiones pro le leaders de lor compania. On dice
que ora es le tempore pro obtenir un nove Consilio de Directore.
   Malgrado tote iste problemas, on dice que Microsoft ha justo comprate
$150,000,000 in certificatos de action in connexion con imbarcar se con
Apple in le disveloppamento de systemas de software basate super JAVA
in le uso del interrete e le systemas de Microsoft.  Isto ha crescite le
precio del certificatos de action in le mercato de certificatos 1/3 in
precio.

Stan Mulaik