Le professor francese de linguistica e associato distinguite del Union
Mundial pro Interlingua, André Martinet, moriva le 16 de julio 1999, 91
annos de etate, solmente un septimana ante le 14-te Conferentia
International de Interlingua in Focsani, Romania.
André Martinet esseva director del recercas interlinguistic
del "International Auxiliary Language Association" ab 1946 a 1948. A su
morte ille esseva professor pensionate de linguistica e doctor al
Universitate de Sorbonne in Paris.
In 1998, André Martinet acceptava le invitation del UMI a devenir associato
distinguite, entrante como collega del duo altere associatos distinguite
del UMI – le premiato Nobel in scientia economic James M. Buchanan, SUA, e
le philosopho italian Giovanni Blandino de Roma. Le associatos distinguite
recognosce que le UMI es un organisation respectabile e interlingua un
projecto digne a supportar.
Pro le UMI, le acceptation de André Martinet esseva multo special. Ille
esseva un del patres de interlingua, habente gerite le labor scientific de
IALA in New York ab julio 1946 a 1948, usque su nomination como capite del
Departimento de Linguistica General e Comparative al facultate del
Universitate de Columbia. In un interview con Panorama (martio-april 1998)
Martinet describeva le interlingua, al qual ille preparava un parte del
via, como "multo romanic, multo proxime a isto que io haberea presentate
excepte alcun punctos de detalio."
Durante multe annos le UMI (non fundate ante 1955) non habeva contacto con
André Martinet, ma al initiativa del Union Interlinguista de Francia on
succedeva trovar le professor pro un interview super le lingua e su labor
preparatori. Esseva iste incontro que resultava in un requesta official ab
le Union Mundial pro Interlingua a Martinet pro facer le associato
distinguite del UMI.
In su necrologia, le jornal francese Le Monde describe André Martinet
como "le memoria vivente del linguistica de iste seculo". Su plus que vinti
libros ha essite traducite in plure linguas, e ille ha scribite quasi 200
articulos e innumerabile recensiones de publicationes. André Martinet
habeva contactos special con altere linguistas de fama mundial como Louis
Hjelmslev.
André Martinet esseva maritate a su Jeanne.