Bon die,
Ecce un responsa plus spiritual al problema del signos religiose, que veni
del Islam ipse. Io lo traduce ex un libro intitulate "Rider con Deo", que es
un libro de contos e aphorismos sufi colligite per Majrouh, un maestro
afghan qui esseva occidite in 1988 per integristas.
Vos debe saper ante toto que le ministro pro education qui proponeva le lege
proponeva etiam que le barba (on pote tunc dicer "barba islamic") sia un del
signos prohibite. Il ha habite un grande protestation inter le politicos e
mesmo le prime ministro e le presidente ha contradicite lor ministro... Le
ministro pro education ha renunciate.
Ora, le pueras moslem ha un alternativa simplissime: sia illas porta le
charpa super le basso de lor visage (ma isto darea a illas un aer gangster),
sia illas porta un barba de Sancte Klaus super le capite...
___________
Un maestro sufi habeva un discipulo qui prestava multo attention a su
persona, e super toto a su barba. Ille lo portava belle e majestose, e lo
manteneva con grande delicatessa, lisiante lo, perfumante lo, si que ille
monstrava gratias a illo le ver visage del perfecte credente.
Tamen le discipulo sentiva olim le besonio de confider su infortuna
spiritual al Sufi:
- Maestro, io ha scrupulosemente sequite vostre inseniamentos, ma sin
successo: necun parvissime illumination, necun levissime signo de
assentimento divin, nihil. Dice me, que sta mal in me?
- Reveni deman, diceva le maestro, e tu habera un responsa.
E, le matino sequente:
- Deo dice que tu te preoccupa plus de tu barba que de Ille.
Desperate, le discipulo comenciava aveller su pilos a plen manos.
- Tu vide, sussurava le voce celeste al aure del Sufi: solo su barba le
interessa!
(Conto de Attar)
_____________
In iste affaire, le unes como le alteres, le islamistas como le politicos,
considera solmente le aspecto externe del religion, e illes oblida que le
plus importante pare de illo es lo interne, le relation intime a Deo. Isto,
al minus, pote esser comprendite ab le politicos. Sed on sape etiam que le
islamistas, como tote le integristas/fundamentalistas, face del religion un
utensile pro lor scopos politic.
Personalmente, como barbate, io pensa que le barba apporta nihil al fide in
Deo. Io time solmente que le accesso al scholas public me sia prohibite...
Pilosemente,
Loeiz.
|
