Nulle persona internalisa ulle lingua exactemente como
su altere usatores.

Saussure e Chomsky recognosce isto quando illes parla
de "lingua" e "parola" in le caso de Saussure, e
"competentia" e "execution" in le caso de Chomsky.

"Parola" e "execution" refere a manifestationes
individual de un lingua.  Pro Saussure, il pare que
"parola" esserea le equivalente de "idiolecto".

"Lingua" (langue) pro ille pare esser un ente
plantonic como, que nos dice, le francese
contemporanee, que, como le triangulo ideal del
geometria, existe in alique como le mente de Deo.
(Iste concepto ha provocate discussiones interminabile
inter philosophos rationaliste e empiriciste trans le
seculos.  Il pare que illos nunquam va terminar.)

Pro Chomsky, "competentia" (competence) pare esser le
systema complete de un idiolecto internalisate in su
forma le plus systematic intra le cerebro del parlator
native de un lingua.

Pro ille "execution" (performance) esserea
manifestationes concrete del uso individual de un
lingua, que includerea errores, formas de hesitation,
e correctiones que occurre in le curso de un
conversation (o, in le caso del linguage scribite, in
le curso de redaction).

Le realitate linguistic collective es que un lingua
reside in le cerebros individual de un communitate de
usatores.  In le cerebro de nulle individuo reside un
version del grammatica de un lingua completemente
identic a illo in le cerebros de altere individuos.

Le transmission de un lingua de generation a
generation es quasi sempre per medio del versiones que
nostre infantes audi in lor familias.  Iste infantes
non internalisa lor linguas native de un maniera
exactemente identic al versiones de lor parentes.

A causa de iste circumstantia, le linguas es multo
instabile e cambia in le spatio e le tempore.  Si tal
cambios place a un persona, ille o illa los nomina
progresso.  Ma si un certe persona non los trova
agradabile, ille/illa los nomina decadentia.

Un familia de linguas es como un arbore.  Si on talia
un branca de un arbore linguistic e usa un serra pro
taliar ex illo un trencho simile a un trencho de pan,
on haberea alique como le francese de Voltaire, le
anglese de Shakespeare o de Mark Twain, le italiano de
Dante, le russo de Pushkin, o le germano de Goethe.

In altere parolas, le "lingua" de Saussure es como un
trencho de pan de unes 0.5 cm ex un branca de un
arbore linguistic, e omne nos parla idiolectos de
nostre linguas materne, cata un de illos al minus un
pauco differente de omne le alteres, simile a parve
pecias de iste trencho de pan.

In un lingua como interlingua, que non ha un corpore
de parlatores native, idiolectos individual es etiam
plus differente del idiolectos de linguas
non-planificate.

Inter interlinguistas, iste circumstantia ha causate
interminabile discussion sur lo que es "correcte" e lo
que non lo es in interlingua.  Io prefere evitar tal
discussiones si io pote proque illes es tan
interminabile como discussiones inter philosophos
rationaliste e empiriciste e nunquam produce
resolutiones final--e probabilemente nunquam los
producera.

Io recognosce que mi idiolecto de interlingua es
solmente un idiolecto inter alteres, ni melior, ni
pejor.  E quando altere personas redige textos que io
presenta a illes pro publication, io prefere lassar
les processar los secundo lor proprie idiolectos
proque io recognosce que io non ha ulle derecto a
mantener que mi idiolecto es le melior de omnes.  Le
studio del linguistica me inseniava isto ante multe annos.

__________________________________________________
Do you Yahoo!?
Yahoo! Mail Plus - Powerful. Affordable. Sign up now.
http://mailplus.yahoo.com