Io jam ha parlate de como in americano pote vader a in
bibliothecas e copiar articulos in magazines e
anthologias pro su uso personal.
On anque pote copiar libros complete, como io jam ha
dicite. Pro exemplo, pro mi proprie uso io ha
photocopiate e inquadernate "A comparative Grammar of
French, Spanish, and Italian" per Oliver W. Heatwole
(que io trovava in un bibliotheca universitari de Los
Angeles) de maniera que io pote consultar lo in mi
apartamento quandocunque io vole.
Ora, si io voleva facer, que nos dice, 12 copias de mi
copia personal de iste libro inquadernate e si postea
io lo inviava a amicos mie per posta gastropode, iste
processo non esserea legal, ma il es multo improbabile
que io esserea processate legalmente post facer lo.
Con le advento del formato MP3 e le logiciel de
Napster, le technologia appareva que nunc permitte que
on copia musica popular ubicunque illo se trova
immagazinate in ulle computator personal o servitor
commercial in omne le partes del mundo.
Iste practica, naturalmente, ha infuriate le companias
transnational que vende dischettos compacte de musica,
e iste companias ha potite obligar que Napster se
claudeva.
Le resulto de isto es que le logiciel cercator de
Napster e altere simile logiciel se ha dispergite in
innumerabile computatores e servitores, e on etiam
nunc pote photocopiar musica in le formato MP3 assatis
facilemente. Iste processo anque es illegal, ma le
practica es tan generalisate que il es difficile
controlar lo.
On ha essayate prevenir tal practicas developpante
systemas de encryption, naturalmente. Companas
cinematic time multo lo que Napster ha facite al
distribution commercial de discos compacte e travalia
arduemente pro developpar lor proprie systemas de
encryption.
In Norvegia recentemente, un juvene norvegiano de unes
16 annos esseva processate in le cortes de ille pais
pro trovar un maniera de disincryptar/decryptar un
programma que preveni que on copia un film cinematic
pro uso in le logiciel de su systema informatic
personal.
Ille esseva declarate innocente. Le corte norvegese
mantineva que on liberemente poteva trovar manieras
pro converter inter formatos electronic pro su uso
personal.
Io crede que eventualmente on potera transmitter
massivemente e universalmente logiciel de decryption
como illo inventate per ille puero norvegian sin le
possibilitate de controlar le processo legalmente,
como il nunc es impossibile controlar le distribution
de musica popular per medio de registrationes MP3.
Ben que io non pote esser completemente confidente con
iste prediction, io crede que eventualmente nostre
corporationes transnational perdera lor lucta contra
le libertate de distribution de documentos (e istos
include presentationes imprimite e presentationes
audio e audiovisual o combinationes de illos), e que
le systema de communication electronic international
essera rapide, facile, e completemente transparente.
Durante multe annos in le prime mitate del seculo XX,
le distribution de bibitas alcoholic esseva illegal in
le Statos Unite. Ma on continuava biber illegalmente,
e eventualmente le Statos Unite esseva obligate a
relegalisar le uso personal de alcohol.
Io crede que tentativas de controlar le movimento
libere de information trans le "cerebro mundial" del
Rete habera un simile curso de evolution. Io es
confidente que le technologia electronic ha su proprie
imperativos contra le quales, con le tempore, il
essera impossible luctar.
Il ha multe informaticos qui crede que omne
information debe esser facilemente disponibile a omnes
qui pote usar lo. Le informaticos qui travalia gratis
pro ampliar e meliorar le capacitates de Linux es un
exemplo excellente de illes. Illes ha habite multe
successo. Mesmo IBM nunc usa lor systema.
__________________________________________________
Do you Yahoo!?
Yahoo! Mail Plus - Powerful. Affordable. Sign up now.
http://mailplus.yahoo.com
|
