ILLES HA FERITE MORTALMENTE LE PC
Son le nove apparatos plus incostose, facile de usar que permitte accessar
le Internet
(Eduardo Nunomura)
Le PC, sigla in anglese pro computator personal, non resiste al proxime
passage de seculo. Illo ha devenite vetule. Le industria comencia a
substituer lo per un infinitate de apparatos minor, plus leve e plus
incostose. Como le television non ha liquidate le radio, le nove meravilias
del electronica de consumption non debe tirar le PC de scena
immediatemente. Illo continuara habente applicationes, mais, supreme
ironia, create sub le signo del modernitate, illo ha devenite un machina
del passato. Pro qui veni de comprar su nove computator con un chip veloce
de 450MHz le affirmation supra pare absurde. Non es. In un ramo de mercato
in que le modellos nove, de minor precio e duo vices plus potente que le
antecessor es lanceate a cata dece-octo menses, le futuro es quasi
instantanee. Ergo, facilemente previsibile. E lo que se previde pro le PC
es un honorabile pension.
"Le computatores personal potente e novissime ja exi vetule del cassa",
sole dicer Scott McNealy, presidente del interprisa american Sun
Microsystems, qui sempre ha spondite in solutiones technologic independente
del PCs. Le ration es le sequente: malgrado quanto moderne totes pote
parer, illos es descendente de un dinosauro original, le Eniac, prime
computator de uso general create in 1946 al Statos Unite. Le Eniac habeva
18.000 valvulas, pesava 30 tonnas e ha costate alcun milliones de dollares.
Su filiettos actual, le PCs, ja pote esser comprate per minus que 1.000
dollares, usa chips potente in vice de valvulas e va intra un valise
executive. Mais, in essentia, illos es le mesme machina. Iste es le
problema con le PC. Illo es troppo potente e complexe. Un studio del
Gartner Group, que emplea le observatores plus attente del mercato american
de computatores, ha concludite que le usatores utiliza a pena 5% del
ressources de un PC. "Qui necessita de un apparato que pote atterrar un
nave sur le Luna quando toto que se desira es inviar un message?",
questiona le revista american de negotios Business Week in su edition del
septimana passate, cuje reporto de copertura tracta del crepusculo del era
del PCs.
Le signales que il es le initio del fin pro le PCs es evidente in le Statos
Unite. Le interprisas fabricante de computatores personal leader de mercato
como Dell e Compaq veniva crescente quasi 50% per anno. Dell ha crescite
solo 38% in 1998. Wall Street quasi habeva un collapso perque le analystas
ha viste non solo un numero. Illes ha constatate que le rhythmo de
expansion del industria de PC pote nunquam plus esser le mesme. Le numero
de casas american con al minus un computator ha stationate a 48% e, secundo
le analystas, non passara multo ultra illo. Bill Gates, qui ha construite
le imperio multimilliardari de Microsoft super le expansion del mercato de
PC, ja prepara su interprisa pro le proxime unda. "Le PC morira victimate
per mille colpos", recognosce Gates. Qual colpos es illes? Le apparatos
incostose e simple, que face ille 5% de cosas que le majoritate del
personas expecta ab un PC: inviar e reciper e-posta, navigar per le
Internet, scriber e editar textos.
Necuno dubita que le nove apparatos del era post-PC sera un successo in
casa e al schola. Lo que forsan ni Gates poterea imaginar es que illos
deveni tamben utensiles vital in le mercato professional -- ubi se
imaginava que le PC haberea un regentia plus longe. Quotidianmente,
dece-duo venditores del interprisa Cimento Ribeirão recipe tosto al matino
programmas de venditas, reportos de viages e datos actualizate de lor
clientes ante exir a campo. Durante le visitas al longo del die, illes face
correction de datos e annota querelas del compratores. Al postmeridie, cata
functionario repassa le nove informationes al interprisa. Cata un del
dece-duo venditores alimenta su Palm III, apparato post-PC que ha le
grandor pauco major que un pacco de cigarettas, con informationes obtenite
ab le interprisa. Desde le initio del mense passate, tres obreros del
fabrica de Volkswagen in São Bernardo do Campo participa in un
projecto-pilota con le Palm III, idealizate per le analysta Carlos Moya.
Illes confere le linea de production e alimenta in le apparato datos que
antea era annotate sur un planchetta. "Si nos usarea le PC nos haberea le
inconvenientia de inseniar informatica al functionarios", affirma le
director de technologia de information, Carlos R. Boschetti. Illo es quasi
un clamor de alleviation pro le milles de personas qui sempre ha trovate le
computatores personal troppo complicate e, a causa de illo, ha essite illes
mesme classificate como obsolete. Ora, al final, obsolete era le PC. #
---
LE SYSTEMAS
Sun Microsystems -- Le systema Jini permittera interligar in un mesme rete
de datos le plus diverse apparatos electronic. Sera possibile, per exemplo,
actionar le systema de illumination de un casa e commandar le furno de
microundas a partir de un bureau distante. Java es le linguage que facera
que le machinas conversa.
Microsoft -- Pro non perder le passo in le historia e tentar mantener le
leaderantia que illo habeva in le era PC, Bill Gates sponde sur le
television per Internet, le WebTV, e pressiona altere interprisas a adoptar
le systema operational Windows CE in le nove apparatos que surge.
LE VEDETTES
3Com e Psion -- Le assistentes personal electronic, PDAs, como le Palm III,
de 3Com, o le Series 5, de Psion, ja permitte leger e-posta e navigar per
paginas del Web. Tosto, nove modellos con modems incorporate sera preste a
navigar per le rete. A partir de 400 dollares.
Aplio -- Illo face appellos telephonic interurban plus incostose per
Internet. Ponite inter le apparato de telephono conventional e le linea
telephonic, ille machina de 200 dollares converte le voces in signales
electronic pro trafficar con le datos in Internet. Con illo, se paga le
precio de un appello local. Proxime passo: convincer le fabricantes de
telephono a adoptar le technologia.
LE INNOVATIONES
TiVo, Replay Networks -- Con le mesme discos dur del PCs, le videocassettas
digital del futuro permittera registrar longe horas de programmation pro
esser spectate quando il sera conveniente. Inter le investitores de Replay
Networks es Marc Andreessen, co-fundator de Netscape.
Seiko -- Le Ruputer es un microcomputator de pulso. Sur su crystallo
liquide se pote actionar un miniclaviero, dactylographar textos, archivar
imagines e executar jochettos electronic. Illo permitte excambiar datos con
altere computatores e, con un telephono mobile, navigar per Internet. Mesmo
con grandor minute, illo es capace de immagazinar 40.000 parolas. Illo ha
essite lanceate in april del anno passate, in Japon, e costa 330 dollares.
iReady -- Le fabricante de microprocessatores iReady ha succedite a levar
ab le investitores 20,5 milliones de dollares pro disveloppar un
chip-navigator. Con illo, le interprisas de electro-electronicos potera
crear apparatos preste pro esser connectite al rete. Con le nove
microprocessatores sera possibile interligar apparatos in rete.
QuBit -- Le quadro electronic functiona como un schermo plan de un
computator. Illo solo non possede un PC detra illo. Le componentes resta
compactate in le schermo. Totevia, illo permitte navigar per Internet,
reciper e inviar e-posta e excambiar datos per medio de su schermo
sensibile. Illo costa, in le Statos Unite, 350 dollares, multo minus que un
PC.
LE FEBRES
Nokia, Qualcomm -- Nokia ha lanceate duo septimanas retro le prime
telephono mobile con accesso al Internet. Le 7110 va adoptar un nove
technologia de comprimer datos del Web in un minibrowser. Le major portal
del Internet, le Yahoo!, ja disveloppa paginas special pro ille formato.
Altere compania de telephonos mobile, Qualcomm, adopta le mesme technologia
pro connecter le apparatos al rete.
Diamond Multimedia -- Lanceate le anno passate, le walkman MP3 ha devenite
un del campiones de venditas in tempore-record -- plus que 250.000 unitates
in tres menses. Non solo a causa del precio (199 dollares in le Statos
Unite), mais tamben a causa de lo que illo es capace. Le Rio PMP300
immagazina e sona musicas del Internet per le systema de codification MP3.
Le presidente del interprisa, William J. Schroeder, ha confessate que un
anno retro ille non habeva al minus un idea de lo que serea MP3.
---
Traducite ab Revista VEJA, edition 1588, anno 32, nº 10, 10 de martio de
1999.
Ensjo.
|
