Gratulationes a Katarzyna Tempczyk pro su action exemplari de facer publicitate super interlingua pro le Die de Interlingua - le 15 de januario.
Illa ha facite un feuilleton pro iste occasion in le quadro del emissiones al estraniero de Radio Polonia, le emissor statal de su pais. (In facto illa ha facite un "hijack" de un programma intendite originalmente pro dar novas super esperanto!)
Auscultatores poteva audir le sequente explication del occasion (traducite de me in interlingua), legite de Katarzyna con un voce melliflue:
"Le 15 de decembre le esperantistas de tote le mundo festa lo que es probabilemente lor festival le plus popular - le festa de Zamenhof. Precisemente un mense plus tarde le adeptos de un altere lingua planificate, interlingua, ha su festa.
Le Die de Interlingua ha un tradition relativemente curte pro que on lo festa solmente de post un dozena de annos. Illo ha essite lanceate non solmente pro reuniones de club e diverse amusamentos ma anque como un bon pretexto pro propagar le lingua in tote le mundo.
Al initio il non esseva facile definir le dato del festa. Le solution del anniversario natal del creator del lingua non esseva apte. Benque le labor final de interlingua ha essite facite de dr. Alexander Gode, interlingua esseva in facto le fructo del labor de multe personas laborante durante annos in le IALA, le International Auxiliary Language Association. Le dato de edition del prime obra super interlingua, le Interlingua-English Dictionary de Alexander Gode, pareva dunque natural. Totevia, anque isto on non poteva precisemente fixar. Le sol dato cognoscite esseva illo del registration del libro presso le bureau statounitese del derectos del autor. Isto occurreva le 15 de januario del anno 1951. E justemente isto es considerate del interlinguistas como le dato symbolic del nascita de lor lingua.
Comparate con esperanto, interlingua es un projecto plus naturalista pro que illo prende su vocabulario del linguas romance. Multe de su adeptos se oppone mesmo a nominar le lingua 'planificate', opinante que le termino 'extracto del linguas romance' es plus appropriate.
Isto causa que, malgrado su irregularitate e alicun difficultate in le parlar, interlingua es tamen multo ben comprensibile pro multe personas qui ha nunquam studiate lo.
On ha utilisate iste proprietate del lingua, inter altere cosas, pro summarios in diverse libros e revistas scientific international, principalmente in le annos cinquanta.
Interlingua ha ancora su proprie movimento assatis vigorose. Su organisation mundial, le Union Mundial pro Interlingua, liga membros de plus que 30 paises. Cata secunde anno su adeptos del mundo integre se incontra durante si nominate 'conferentias international' qui ha loco in diverse paises.
In le periodo interconferential illes pote intercambiar su experientias e opiniones in le revista mensual 'Panorama'. In le quadro del UMI es active anque un dozena de organisationes national. Alicunes de illos organisa incontros local, national o regional.
Actualmente, ultra le mundial 'Panorama' appare anque septe revistas local."
Bravo, Katarzyna!
Con salutes festive,
Don
---------------------------------
Do you Yahoo!?
Yahoo! Hotjobs: Enter the "Signing Bonus" Sweepstakes
|
