Mario ha dicite que ille ha nascite sex di es ante le secunde
guerra mundial. Si io memora le historia correctemente, le
guerra ha comenciate sept. 1, 1939. Ergo, su anniversario
es le 26 de augusto--o ha io calculate incorrectemente?
Io ha nascite augusto 23, 1962, le 35me anniversario del
die in le qual Sacco e Vanzetti ha morrite in un prision
american. Illes era italianos como Mario mesme, illes era
anarchistas como io mesme--e illes era executate per le
stato de Massachussetts.
Hodie il es universalmente cognoscite que Nicola Sacco
e Bartolomeo Vanzetti era innocente, e que illes era
le victimas del persecution del stato, e le victimas del
pena capital. Mesmo le stato que ha executate los nunc
sape le veritate, e in 1977 le 50me anniversario de
iste injustitia (e mi 15me anniversario) era "Sacco and
Vanzetti Day" ("Le Die de Sacco e Vanzetti) per un
official proclamation del governator de Massachusetts,
Michael Dukakis (qui postea, in 1988, era le candidato
pro le presidentia del Partito Democratic). Forsan le
memoria del disgratia de iste executiones es un del rationes
perque Massachussetts es un del poc minoritate de statos
american que hodie non ha le pena de morte.
Illes era executate un poc minutos post medienocte, al
commencio del 23 de augusto. Le nocte del 22 de augusto,
in le horas immediatemente ante le execution, il era multe
manifestationes contra le executiones, in multe citates, in
multe partes del mundo. Ci in Nova York, 100,000
personas manifestava in Union Square pro protestar le
assassination. Un de iste personas era un juvene anarchista
de 15 annos, Sidney Solomon. In iste anno de 2000, al
etate de 88, mi amico Sid Solomon (como su sposa Clara)
es un del plus active anarchistas in Nova York, e hodie, in
le momento in le qual io scribe isto, Clara es in un hospital
post un operation cardiac, e Sid es in un altere hospital
post un operation renal (ah, Mario, io spera que le
recuperation de su fratre Gianni continua ben...)
In 1947, pro le 20me anniversario del executiones,
Albert Einstein ha dicite: "May Sacco and Vanetti
continue to live as symbols in all those who strive for a
better morality in public affairs." ("Sacco e Vanzetti debe
continuar a viver como symbolos in tote illes qui travalia
pro un melior moralitate in cosas public.")
Si, iste travalio pro un melior moralitate continua: deman,
73 annos post le executiones de Sacco e Vanzetti, un
altere persona sera executate in le stato de Texas al
hora de 6:00 PM (in Texas--le hora de 7:00 in Nova
York). E deman, mi 38me anniversario, al hora de
6:45 PM ci in Nova York, 15 minutos ante le execution,
io sera in Times Square, in le insula de traffico a strata
46 e Broadway, como un actor in "Not in My Name,"
un drama de protesto contra le pena de morte.
|
