LE ESPANIOL SIN UN CAPITE
Per J. Frank Dobie in
On the open range (In le campania aperite)
Historias del Sud-west e su vaccheros
Dallas, Texas: The Southwest Press, 1931,1940

Ubi tante cavalleros ha galopate in cata tradition quotidien, il es natural
que aqui e la il ha un cavallero spectro qui debe esser in le sella equalmente.
Le espaniol cuje cranio non conformarea se a su skeleto esseva un
cavallero extraordinari.

Le hiberno ante que le territorio pertinente al Indigines Cheyenne e
Arapahoe in le west de Oklahoma esseva aperite pro le colonization in
1892, Oncle Guilliamo Morse trappava secundo le  limitate basse del
region. Iste limitate esseva marcate per le nord furca del Fluvio Rubie
(o Colorate).

Un die ille discoperiva un ben usate curso pro procyones lavatores [racoon]
e,  sequente lo, ille veniva al bucca de un caverna.  Ille non lo explorava,
mais foras ille notava alcun vites sec del melon de aqua, e meraviliava super le
maniera in que illes habeva spontaneemente se offereva a locar se la in
un tal loco remote. Ille ponite su trappas e alora pois que ille habeva un
ballo de pelles de procyones lavatores, ille continuava in avantiar se.

Un bon die del primavera plure annos plus tarde alcun novemente arrivate
colonos secundo le campania  fluvial esseva caciante un coyote quando
illo curreva in le caverna del procyones lavatores.  Illes se determinava a
caper lo e inviava duo parve pueros al casa de un fermero in le vicinitate
pro facer se prestar a illes un lanterna, un balla de corda ligante, e un
sarculo a excavar. Durante que le homines attendeva al retorno del pueros
con iste cosas, illes notava le vites del melon de aqua cultivate al entrata
al caverna como si illos ha essite cultivate per alcuno. Le pueros retornava
con le cosas, e le integre partita se entrava le caverna. Le caverna esseva
'tanto sec como un ossario' e evidentemente non jammais stillava le aqua. In
certe locos le homines debeva reptar. Circa 15 metros dentro le caverna
illes trovava alque que les faceva oblidar le cerca pro le coyote.

illo esseva le skeleto de un homine. Proxime a illo esseva le corpore de un
sella vetere.  Coyotes habeva masticate le corio de illo. Un del homines
dava un colpo de pede al immunditia e revelava un freno de laton; illo esseva
del stilo rumpimandibule  espaniol. Al latere del skeleto esseva un antique
fusil focate per scintilla de petra, e le ferrugine al superfacie del tubo del
fusil esseva le imprimites de semines del melon de aqua. Un vetere caciator de
buffalos diceva que le fusil e sella esseva ambe fabricate al maniera espaniol.
Subto un planca de petra super le skeleto esseva un par de moldos de bollettas,
alcun plumbo, un corno de pulvere, e un cucurbita antique que serviva pro portar
aqua.

Mais le skeleto non esseva ordinari. Illo esseva de un homine de talia de 2,13
metros e esseva sin capite. In un niche a un distantia de 6,1 metros
del skeleto un cranio non plus grande que le pugno de un homine esseva trovate.
Esseva possibile que le cranio pertineva al gigantic skeleto? Le ossos de un homine
morte es semper un mysterio.

Le caciatores de coyotes colligeva toto que illes poteva trovar, e aquelle
mesme die illes portava le relicos al boteca le plus proxime in le vicinitate,
circa 12 km distante.  Aqui le bon citatanos secundo in alto e in basso del
Furca Nord se colligeva pro vider e discuter los, e 'le skeleto del caverna de
procyones lavatores' deveniva le parlar del region.

Tote le homines sapiente esseva de accordo que le ossos esseva de alcun
vetere explorator antique espaniol qui habeva essite isolate de su partita e
habeva prendite refugio in le caverna a parte del indigines. Alcunos esseva
del opinion que ille habeva essite vulnerate proxime al entrata del caverna
e reptante con su equipamento habeva reptate se dentro lo pro morir. Secundo
alteres ille habeva gustate le caverna tanto ben pois que ille prendeva refugio
in illo que ille continuava habitar lo como un eremita e moriva la de un morte
natural.  Parve pecias de su pilo colligite proxime al cranio monstrava que illo
non ha essite scalpate. Mais Oncle Guilliamo Morse, qui finalmente se retornava
a su vetere terra de trappar justo quando le debattos esseva le plus calide,
declarava que le pilo esseva de un skunk.

  Quicunque o qualcunque le skeleto habeva essite, un cosa esseva certe:
le homine qui lassava su ossos in le Caverna del Procyones Lavatores esseva
portante le semines del melon de aqua per tote le region como Johnny Appleseed
plantava le pomos super Arkansas, Ohio, e altere statos.

  Mais necuno habeva un theoria super le cranio de un nano e su
connexion con le skeleto.  Le venditor del boteca diceva que on debe invitar
un professor universitari--uno que sapeva tote cosas super le ossos--
venir pro clarificar le mysterio.

Alora un nocte le skeleto, sella, fusil, e le freno de laton se disappareva.
Le cranio esseva lassate al boteca.

Le sequente die un homine appellate Oxworth, qui habitava un casa circa
16 km del  boteca, lassava su juvene sposa al casa solo durante que ille
viagava al boteca. Como ille  viagiava de retro verso su casa, ille pensava
del novas del skeleto que ille haberea dar a illa.  Quando ille arrivava a
su casa ille trovava que illa habeva alque dicer a ille.

Su conto esseva de un homine extranee, vestite in un antique costume
espaniol qui habeva cavalcate a lor porta in le barriera al fronte de lor
casa. Ille stoppava, levava su manos in alto e a basso in un maniera
fatigate, e alora circulava le casa quatro vices, cavalcante multo, multo
lentemente. Ille esseva super un cavallo de pur nigre.  Pendante de su
sella esseva un longe fusil antique--e ille habeva necun capite! Finalmente
in loco de cavalcar se via de la, "ille justo distingite se como un bruma del
matino."

Le sequente die circa crepusculo un femina plure kilometros distante
de la videva le mesme cavalcator sin capite in le ancian costume espaniol
approchar su casa.  Ille esseva super le mesme pur nigre cavallo, e, ben que
ille veniva multo lentemente, ille semblava haber essite cavalcante se
multo dur proque le femina diceva que illa poteva audir le cavallo sufflante.
Illa videva rubie in le nares del cavallo e blanc spuma de perspiration super
su collo e flanco. Su bucca esseva coperite con parve maculas de sanguine,
"como si illo habeva essite tirate e secate con un freno espaniol de laton.
Nihilo poteva esser plus real que le cavallo e cavalcator--solmente le
homine habeva necun capite. "Illes non exactemente partiva; illes solmente
se distingeva." Le femina esseva solo quando illa videva le extranee
cavalcator; su sposo habeva ite comprar un vacca de lacte, e su tres
infantes esseva in un parve depression in le terra al posterior de su
casa, conducente un gallina de India e su nidata juvene.

Ante que le septimana esseva al fin, le cavalcator mysteriose habeva essite
vidite quatro vices, in cata instantia per un femina solo.  Le ultime del
feminas qui le videva, diceva que ille portava al fronte de su sella un grande
Alabama Dulce, melon de aqua e que ille elevava lo in alto e a basso
lentemente  e con movimentos fatigate, "justo como Sra. Oxworth
videva le  levante su manos in alto e a basso."

Un pauc septimanas passava, e le espaniol sin capite continuava
apparer in locos multo separate. Feminas refusava remaner a casa
solo, e le integre affaire esseva deveniente plus e plus difficile que
interessante,  mais necuno sapeva como 'interrar le spirito'.

Alora le venditor del boteca suggereva que si le Caverna del Procyones
Lavatores esseva explorate mesmo plus, alque possibilemente
esserea apprendite que resolverea le affaire. Totevia Le Caverna del
Procyones Lavatores esseva fortemente suspecte esser le quartiero
general del "Spirito Espaniol" e necuno in le  region voleva explorar lo.
Un bursa de novem dollares esseva cfreae pro alcun homine qui facerea
un complete investigation del caverna.

A iste junctura, un vacchero del Manico del Patella de Texas veniva.
Quando ille audiva del bursa de novem dollars, ille diceva, "Justo dar
me tempore pro remover mi sporones e io es preste de reptar dentro lo."
Un hora esseva decidite; le venditor del boteca claudeva su boteca e
gentes pro milas in tote directiones veniva  pro colliger se al bucca
del Caverna pro vider lo que possibilemente esserea trovate. Un cosa
esseva tosto notate: plure melones de aqua esseva super le vites al
fronte del caverna e que fresc semines esseva dispergite super le terra
al entrata.

Le vacchero esseva equipate con un pistola de sex tiros, un
cultello del cinctura, e un lanterna al oculo de un tauro.  Il habeva
cinque annos post meridie quando ille entrava le Caverna del
Procyones Lavatores.  Ille non jammais ha essite vidite o audite depois alora.
Le die post que ille disappareva un forte  gruppo de homines armate
explorava le caverna tanto distante como illes osava in cercar le. Mais illes
non attingeva le fin del tunnel obscur.  Al mesme tempore le espaniol sin
capite subitemente cessava su apparentia a homine o femina.

In le west de Oklahoma, nonobstante, le conto del gigante skeleto e
le phantasma cavalcator es ancora fresc. Le parve cranio ha essite
perdite; mais aqui e la es un cretura del melon de aqua que secundo
le pretensiones de su proprietario  es descendite del vites que cresceva
al entrata del Caverna de Procyones Lavatores.  Aquelle melones de
aqua es tanto bon como le arbores que veniva del semines plantate
per Johnny Appleseed.

Traducite del anglese per Stanley Mulaik


--
Pro leger le archivos e pro modificar o cancellar le subscription:
http://listserv.icors.org/archives/interlng.html