Salute, quando Stan scribeva del _spectaculo_
in su message, ille plus tosto pensava del
presentation scenic in re le annos quarantas que
le congregation habeva facite, e le qual on va
monstrar per le television al die de Natal.
Ego non del toto le comprendeva assi que ille
habeva le servicio divin in mente, usante le parola
spectaculo sed solmente le presentation scenic.
In svedese le parola spectaculo se usa in re un
situation bisarre. Como quando le politico russe,
Zhirinovskij jectava un vitro de bibita - io crede
que il era aqua - in le facie de un antagonista
durante un transmission televisive directe. Sed
in interlingua io comprende le parola spectaculo
como un cosa scenic, un pecia, un presentation.
In Suedia cata cive qui non annuncia un altere cosa
es registrate como membro del ecclesia protestante
e es baptisate - si su parentes lo vole - al etate de
un infante (bebe, baby).
Quando ego in le anno 1967 exiva ex le ecclesia, ego
vadeva al autoritate parochial (del congregation) que
nos appella le _expedition pastoral_ e completeva un
formulario e lo subscribeva, con le intention de lassar
le ecclesia, e isto era isto.
Ego ha legite que in alque altere casos on habeva deman-
date le personas pro que illes lassa le ecclesia e
querite de su rationes pro facer isto. Nulle tal cosa
ergo occurreva in mi caso.
Tunc ego idiota credeva que ego va pagar nulle plus
taxas al sustention del ecclesia, sed isto era un
illusion. Ego debeva nonobstante pagar pro le manteni-
mento del edificios ecclesial, tanto que in moneta mi
exito non significava multo, solo alcun öres
(o-umlaut;res) - centos svedese (si le corona es
equal al dollar).
Ego crede que ego sequeva un patrono sociologic,
tipic pro un pais con solo un religion. Si il ha un pais
con multo varie religiones, ubi le religion es ligate
al nationalitate, o provenientia etnic, si vos vole,
le situation poterea haber essite un altere. Como in
plure paises asiatic.
Ego ha le impression que religiones que es le objecto
de competition es multe plus vital que tal que lo non
es. Assi ego crede que le catolicos in Svedia es multo
plus vital que le ecclesia protestantic statal.
Il es si facile haber prejudicios. Le prime vice que ego
incontrava Paolo, durante le conferentia interlingua in
Zwolle in Nederlandia, ego era multo suprprendite
apprender que il ha parlatores de italiano qui non es
catolic sed protestante, reformarios, si io ha
comprendite toto correcto. Isto era un cosa nove pro
me.
A mi tempore scholar le cristianismo ancora era un
subjecto scolar, e in le scola in le qual io vadeva, il
habeva cata die un servicio divin. A iste scola io veniva
plus o minus como un plen pagano! Un puero de un
familia pentecostal deveniva - e resta - un de mi optime
amicos!
Forsan il es un mal cosa nutrir le alumnos scolar per un
ideologia o religion. Personas del paises ex-communistas
me ha frequentemente narrate como on habeva le
ideologia statal usque al aures...
Nos habeva un institutor ateista, qui usava le incontros
matutinal pro disseminar su opiniones. Isto era un
cosa enorme. On pensava: Como pote ille dicer tal
cosas?!
Il habeva mesmo un tempore quando io pensava que
va devenir un missionario e salvar le povre paganos
in Africa, o plus tosto in Congo! Ego nunquam deveniva
un missionario, e forsan le autoctonos de Africa debe
gauder se de isto! Sed - isto es un cosa fascinante -
mi fratre, filio de mi patre in un altere maritage, ha
laborate como inseniante in Africa, probabilemente
intra le mission! E nos NON habeva ULLE contacto in
mi infantia! Parlar de genos...
Approximante me al confirmation al etate de 13 ego
non faceva si grande studios como Stan e faceva un
altere decisssion. De facto io parlava con un camarada
del grande cosas. Con mi amico le pentecostal nos in
simul legeva le Revelationes, (le Apocalipso) in le qual
ille a ille tempore credeva absolutemente, in le mesme
maniera que il ha personas qui crede in le divinationes
de Nostradamus. Isto era un lectura multo suggestive.
Mi ex-marita/sposa es catolic, e mi infantes habeva un
education catolic. Lo interessante es que su position in
general es multo simile a illos del resto del societate.
Le subjecto _religion_ in le schola non ha in nostre dies
le mesme qualitates de indoctrination como in mi tempores
scholar, sed mi grande filia me diceva, quando io la demanda-
va del cosa, que illa videva le description del catolicismo
del schola como multo partial - in disfavor al catolicismo.
Ego personalmente non crede in deo, sed il me pare un poco
exaggregate appellar me ateista, proque isto suggere que
ego ha un plenmente evoluate sistema de crede. Isto non
es tal. Ego de facto non pote saper...
Si il es assi que un fortia logic ha create le universo, il es
a mi aviso impossibile attribuer un certe sexo o un certe
forma a ille _spirito_ (si vos vole). Il es in un maniera, que
deliberationes super le question si ille fortia existe o non
jace supra nostre nivello de comprehension. E lo que ego
crede o non crede in relation a ille fortia, isto es totalmente
sin ullecomque interesse a ille fortia.
Un mi amico es un ateista luctante. Isto es un attitude que ego
solmente pote comprender in le caso si adherentes de un
religion, non importa qual, exige que io crede in un certe
maniera. In mi caso isto quasi nunquam ha occurrite.
Ego videva ante alcun annos un programma televisive que
me ha impressionate grandemente. Illo narrava de gentes
nilotic, vivente al fontes del Nil. Le programma era un de
ille creationes antropologic, que on subinde pote reguardar
in le TV. Ille homines viveva in un situation totalmente de-
pendente del membros de un altere tribo. Le "sclavos"
debeva demandar su maestros in omne campos del vita
que facer. Le mastros decideva qui essera le marita de un
viro e decideva lo que ille viro poteva comprar etc. Ille
personas comprendeva nihil in re democratia, que lor
conditiones era mal o injuste.
Isto demonstrava a me in qual grado enorme nos es sub
le influentia de nostre ambiente e del circumstantias. Il
ha un massa de factores sociologic e historic que determina
nostre decissiones in varie situationes.
O, io debe finir mi deliberationes pro hodie.
Amicalmente
Kjell R.
|
