HRI Varberg - le umbilico del mundo
xSteI xEnfE

[log in to unmask]
Lege con fonte Courier new 10!

Estimate interlinguistas!

--------------
Veter anthrace
--------------

Recentemente in nostre cabina finseptimane in foreste
quando nos connecteva nostre television pro le novas
matinal le schermo era plenate con un mappa de
Scandinavia que era fornite con un singule puncto e
nomine: "VARBERG". Nos era stupefacte sed tosto il se
monstrava que il era question de un epidemia de veter
anthrace.

Como cognite, Varberg es un del centros principal de
interlingua in Svedia, un citate ubi habita Ingvar
Interlingvar Stenström, le Socrates de Varberg e Erik
Enfors, etiam un veterano emerite de interlingua. Erik
es un veterinario pensionate e certo multo ben sape le
veter anthrace - como etiam faceva mi patre qui era le
prime doctor veterinario in le historia de Finlandia
( http://www.interlingua.fi/kiva/haanedoc.htm ).

---------------
Tremor de terra
---------------

E post alicun dies Varberg (tote le vicinitate de
Varberg) era un centro de attention pro un
relativemente grande - e rar in Scandinavia - incidento,
un tremor de terra que era observate etiam in
Copenhagen, le urbe de "Panorama".

Io ha experite un seismo tres vices in mi vita: In
Finlandia e Helvetia - in ambe casos io "audiva"
solmente un enorme tonitro INFRASONIC, sed altere
personas, mi sposa includente, circum me remarcava
nihil. Iste incidentos era un grande sensation in le
media in ambe paises, in Helvetia iste seismo era le
plus grande desde le 1930's.

In 1966 nos sentiva in un hotel in Mostar (le capital
de Hercegovina in ex-Yugoslavia) que le pavimento
vacillava. Nos non credeva que illo era un seismo sed
pensava que il era question de un rivo subterrestre.
Le sequente die nostre amicas con qui nos habeva
facite amicos quatro annos antea in Bohinj, un
placia meraviliose in Slovenia, diceva que il habeva
occurrite un seismo que era tanto forte que on poteva
sentir lo ancora in le secunde etage - sed non in le
prime.

Ante alicun annos quando un seismo terribile habeva
occurrite in Turchia, est de Istanbul, nos passava
nostre vacation in Marmaris. Il occurreva un seismo
mesmo in Marmaris sed illo era assatis debile.
Nonobstante alicun personas era ferite - illes qui
habeva essite evacuate ab le sito terribilissime in
Turchia del nord e qui habeva saltate via per
fenestros. Nos arrivava a Marmaris solmente quatro
dies post le ultime post-tremor. Le turcos era ancora
nervose e un parte e.g. del personal de hoteles
passava lor noctes al aere libere, como etiam alicun
touristas finlandese e alteres. Mi sposa e io
pernoctava in le casa sed nos habeva nostre pantoflas
dirigite verso le porta exterior.

Ben, nos non ha experite un ver tremor de terra sed il
era menaciante a esser apud un area in Agadir,
Morocco, que habeva essite totalmente destruite per
un seismo.

-------------------------------------------
Varberg ex angulo de historia e interlingua
-------------------------------------------

In Varberg existe un fortalessa magnific medieval, que
se trova ancora in bon condition. Ab ille fortalessa
Margareta, le regina danese, regeva in le 13e e 14e
seculo super tote le Scandinavia e Finlandia e mesmo
Islanda.

E illac ancora rege le grande interlinguista, Ingvar
Interlingvar Stenström, le Socrates de Varberg, qui ha
essite un interlinguista durante plus quam 50 annos e
inseniate interlingua in schola durante multe, multe
annos.

Lo que es multo importante es que Ingvar ha scribite
su memorias que va - speramente - imprimite tosto.

- - -

Salutante

Allan Kiviaho

:::::::::::::::::::::::::::::::::::::::::::::
Kiviaho Allan
SILY - Suomen Interlinguayhdistys ry.
FILF - Föreningen för Interlingua i Finland
AFIL - Association Finlandese pro Interlingua
http://www.interlingua.fi
http://www.interlingua.fi/ceiafil/ceia.htm
- - - - - - - - - - - - - - - - - - - - - - -
ePosta - Sähköposti - eMail, clicca:
http://www.interlingua.fi/kiva.htm
:::::::::::::::::::::::::::::::::::::::::::::

--
Archivos e disabonar: http://listserv.icors.org/archives/INTERLNG.html