Con respecto a mi classification de Russia como representative de un
civilization distincte del civilization europee (le "west"), io es
influite per un libro titulate "The Clash of Civilizations", cuje
autor, le nomine io oblida.  (Io ha prestate le libro a mi filio).
Le autor es un contributor al deliberationes del Consilio super
Relationes Estranier e su jornal Foreign Affairs.  In iste respecto
su opiniones es importante proque illos influentia un centro importante
de opinion in aqueste campo.  Mais su argumento es que il ha plure
civilizationes major in le mundo, in competition, e que con le
melioration economic del regiones continente aqueste civilizationes,
illes va reasserer se accrescentemente in le proxime seculo.

Su analyse del civilization russe nota que illo es a vices dividite inter
le west e su proprie civilization centrate super le ecclesia orthodoxe
russe.  Le civilization europee pare identificate per le extensiones
del ecclesia catholic roman e le ecclesias protestante. Aquesto non es
a dicer que aqueste ecclesias es tanto importante hodie in definer le
civilization, mais historicamente le frontieras de aqueste civilization
ha essite extendite per le extension de aqueste ecclesias per le mundo.
Polonia, Lituania, Finlandia, Czech Republic, Croatia, e plure alteres
ubi o le Ecclesia Roman o le protestantismo ha essite dominante, es
parte del civilization europee (e equalmente le paises del hemisphero
occidental, Australia, Nove Zelanda).  Le Phllipinas es problematic.

Le populos in aqueste varie civilizationes es differente in lor
vision del mundo, le scopo de lor aspirationes, lor conception del
vita quotidian, lor religiones.  Ben que le civilization europee ha
habite un major influentia per le mundo del seculo 20e, si le
poter economic accresce in India, China, Russia, le mundo islamic,
nos va vider que lor civilizationes va reasserer se contra le
civilization europee.

Stan