Io veni de finir leger un libro multo interessante, illo se appella "1984",
scribite per George Orwell (1903-1950). Como vos vide, considerante le anno
del morte del autor, il se tracta de un vision de un futuro post un
revolution, un futuro ubi le vita es insupportabile. Le mundo es dividite
in solo tres grande paises (Oceania, Eurasia, Estasia) in guerra constante.
Il ha pauc cibo [food], pauc moneta, le personas usa vestes vetule e
lacerate. Un homine appellate Winston comencia imaginar si le cosas habeva
sempre essite assi, si le cosas non poterea esser differente... Ma pensar
assi es multo, multo periculose...
Io traduceva alicun fragmentos, que non del toto suffice pro dar le
sentimento de agonia que nos accompania durante le lectura. Si tu potera,
compra le libro e lege lo. Vale le pena.
(E forsan alicuno lo volerea traducer a Interlingua?)
"(...) un placard (...). Representava solo un facie enorme, de plus que un
metro de altor. (...) 'LE GRANDE FRATRE VIGILIA SUPER TE', diceva le
legenda."
"Intra le appartamento (...). Le voce exiva ab un placa metallic
rectangular (...) Le apparato (se appellava teleschermo) poteva haber su
volumine reducite, ma era impossibile disligar lo del toto. (...) Le
teleschermo recipeva e transmitteva simultaneemente. Qualcunque ruito (...)
serea capturate per le apparato. (...) poterea esser vidite tamben. (...)
le Policia del Pensamento. (...) On debeva viver -- e on viveva per habito
transformate in instincto -- in le supposition de que cata sono era audite
e cata movimento examinate, salvo quando facite in le obscuritate."
"(...) le tres lemmas del Partito:
GUERRA ES PACE
LIBERTATE ES SCLAVITUDE
IGNORANTIA ES FORTIA"
"(...) initiar un diario. Non era un acto illegal (nihil plus era illegal,
pois il non habeva plus leges), nonobstante, si discoperite, il habeva
rationabile certitude de que ille serea punite, per pena de morte, o al
minimo vinti-cinque annos in un campo de travalios fortiate."
"(...) le prisiones era sempre de nocte. Le subite extraction del somno, le
mano rude succutente le humero, le luces feriente le oculos, le circulo de
facies implacabile circa le lecto. In le vaste majoritate del casos il non
habeva judicamento, ni notitia del prision. Le personas simplemente
dispareva, sempre durante le nocte. Le nomine del citatano era removite ab
le registros, supprimite omne mention a ille, negate su existentia
anterior, e depost oblidate. On era abolite, annihilate, vaporizate era le
termine usual."
"E si omne alteres acceptava le mendacio imponite per le Partito -- si omne
annales diceva le mesme cosa -- alora le mendacio deveniva historia, in
veritate."
"Non era veritate, per exemplo, como affirmava le libros de historia del
Partito, que le Partito habeva inventate le aeroplano. Ille rememorava
aviones desde su infantia. Ma ille poteva provar nihil. Il nunquam habeva
prova."
"Si tosto que era reunite e classificate omne correctiones considerate
necessarie a un certe numero del Times, ille edition era reimprimite,
destruite le numero original, e le exemplar correcte ponite in le archivo
in su loco. Iste processo de alteration continue non se applicava solo a
jornales, como tamben a libros, publicationes periodic, brochures,
placards, foliettos, films, bandas de sono, caricaturas, photographias --
omne specie de litteratura o documentation que poterea haber le minor
significato politic o religiose."
"Omne matrimonios inter membros del Partito debeva esser approvate per un
committee nominate pro iste fin e -- ben que le principio jammais era
clarmente declarate -- le permission era recusate si le par dava le
impression de haber qualcunque attraction physic."
--
ENSJO*: EMERSON JOSÉ SILVEIRA DA COSTA
E-mail : [log in to unmask] [<Ø>] Brasil!
Homepage : http://www.nautilus.com.br/~ensjo/
Telephono: (091) 231-5740 // +55 91 231 5740
UIN ICQ : 713833 [* "sj" pronunciate "sh"]
INTERLINGUA - lingua auxiliar international
Info : http://www.interlingua.com
Grammar : http://www.nautilus.com.br/~ensjo/interlingua/english.html
|
