[ Kjell ]
Io pensa que il es un cosa impressionante que le Statos Unite succedeva de
crear un si relative ben equipa si on pensa del facto que football non
sembla esser un joco multo popular in ille parto del mundo. Io non essera
stupefacte si - post alcun annos - on habera un multo bon equipa de foot
associational ;-)
[ Pfaff ]
Le "soccer" (futebol) hic in le USA ha crescite multo durante le ultime
duo-tres decennios.  Quando io era juvene io NUNQUAM videva un joco de
futebol!  Io NUNQUAM habeva un opportunitate a jocar lo UN SOL VICE!  Que
PEEENAAA!!!!!  Io ama le futebol.  Quando, con dece-octo annos, io vadeva
al universitate io comenciava jocar futebol.  Nos habeva studentes ex
Germania, Hollanda, Austria, Brasil, Chile, Nigeria, China, Peru qui voleva
jocar.  Anque il habeva semper alcun partes in le USA ubi le futebol era
jocate (e.g. St. Louis - multe germanos,  Nova Anglaterra - portugeses,
italianos, e irlandeses). Durante mi quatro annos illac io jocava con illes
ma solmente in le sessiones de exercitation.  Postea, durante varie
periodos de mi vita, io habeva opportunitates a jocar un pauco, ma vermente
pauco.

Quando mi filio era cinque io discoperiva que un nove organization de
futebol juvenal ha essite fundate in nostre citate, e io comenciava
travaliar como patre-trainator voluntari in su equipa.  Durante dece annos
io ha trainate juvenes e anque io ipse ha jocate informalmente con homines.
Nostre population ha multe gentes ex paises ubi futebol es jocate e mi
amicos de futebol veniva ex Argentinia, Columbia, El Salvador, Polanda,
Germania, Canada, Jamaica.  Le major representation era le Brasilieros.  De
facto, mi amor e appreciation pro le lingua belle portugese-brasilian ha
comenciate sur le campo de joco con ille companiones si amabile.  Un anno
nos formava un equipa formal e jocava in un parve liga local.  Il habeva un
equipa columbian, un equipa finnese (nos ha un colonia finnese in le citate
vicin, Lantana), e varie equipas de nationalitates mixte. (Multo periculose
illac in Lantana!!  :-))  Nostre equipa
brasilian/columbian/american/german/argentinian/israeli/jamaican vinceva!

Quanto al futuro del futebol american:  Io ama futebol; ma io pote dicer
con honestia que il es multo plus importante a me que le juvenes american
non plus debe crescer sin opportunitate a jocar iste joco belle.  Haber
successos american sur le scena international de futebol non es importante
a me.  Naturalmente il ha semper le grande chauvinismo nationalistic que
vole semper agitar le bandieras.  Ma, in mi opinion le major successos del
sport american son jocos como "softball", ubi familias e amicos veni a
parcos, forma equipas sin trainatores e sin uniformes, e joca pacibilemente
sub le sol del postmeridie.  Si le americanos del futuro face non plus que
isto con futebol, illes haberea ganiate multo...

-- frank