LE DIVERTIMENTO ES CONTROLAR PERSONAS
_The Sims_ es un mixtura de _Tamagotchi_ con _SimCity_
(Per Einar Saukas)
In le film _Matrix_, le vitas human non es plus que illusiones intra un
computator. Pur fiction scientific? Tal futuro ja non pare tanto distante
post le lanceamento de _The Sims_, un simulator de personas que ha
devenite le grande sensation inter le videojocos. Su autor es Will Wright,
le mesme responsabile pro le famose serie _SimCity_. Ora, in vice de
administrar un citate, le jocator controla le vita quotidian del
personages intra lor casas.
_The Sims_ comencia con le creation del habitantes virtual. Uno pote
selectionar nomine, apparentia e personalitate de cata un, definiente su
grado de munditia, timiditate, pigritia, serietate e patientia. Iste
characteristicas es responsabile pro le maniera como le personas se
comporta autonomemente, quando illes non recipe ordines directemente del
jocator. Per exemplo, un personage multo extrovertite e jocose va esser
sempre in eventos social, ma probabilemente lassara le casa disarrangiate
si le jocator non mantene le oculos super ille.
Post isto, basta selectionar un casa pro cata familia e illes ja
comenciara a viver in function de lor necessitates basic. Si ille lo vole,
le jocator pote controlar tote le activitates de un familia, commandante
totes a preparar repastos, baniar se, dormir, organizar festas, dansar e
haber incontros amorose. O alteremente ille pote lassar le personas ager
per se mesme e preoccupar se solmente con le questiones plus importante de
lor vitas: matrimonio, empleo, compra de mobiles e apparatos
electrodomestic, construction de piscina, reforma del casa...
Claro que le vita non serea tanto divertente si toto sempre resultarea
ben. Intentionalmente o non, le jocator pote lassar le ambiente domestic
devenir un inferno, con immunditia in tote partes e luctas inter membros
del familia o mesmo con le vicinos. Uno pote mesmo arrivar al puncto de
lassar alcun personages morir de fame o in un incendio. In iste caso, le
unic solution es interrar le in le jardin e transferer tote le cameras de
dormir del casa al secunde etage, pro mantener le resto del familia
distante del phantasmas.
_The Sims_ non ha un objectivo specific a esser complite. Le divertimento
es justo in le libertate de selection que illo offere al jocator. Le
melior forma de diverter se es experimentar varie personalitates
differente, cambiante de vita tote le tempore, evitante cader in le
routine. ###
Fabricante: Maxis (http://www.thesims.com/)
___
Revista INFO EXAME, anno 15, nš 169, abril/2000, pp. 138-139.
Traducite per Ensjo.
|
