Car amicos,
Como vos sape, le proxime conferentia international de interlingua
essera organisate inter le 27 de julio e le 3 de augusto 2013.
Iste vice, le Consilio Executive del Union Mundial pro Interlingua ha
decidite de essayar un cosa totalmente nove: invitar le membros del UMI
a contribuer al organisation del conferentia.
Pro facilitar vostre participation, nos vole establir plure
"commissiones". Un commission es un gruppo de labor plus o minus
independente que organisa un certe aspecto del conferentia, subjecte al
approbation final del Consilio Executive. Cata commission es presidite
per un membro del Consilio Executive, ma invita omne membros del UMI (o
de su organisationes associate) a participar in le processo de organisation.
Le prime commission de membros que nos vole activar es le COMMISSION DEL
PROGRAMMA. Le objectivo de iste commission es crear un programma
coherente pro le conferentia, con discursos, seminarios interactive,
etc., e submitter iste programma al Consilio Executive pro approbation.
Naturalmente, le traditional excursiones touristic e altere activitates
amusante essera organisate tamben, ma non per iste gruppo particular. Le
presente commission vole concentrar se sur le contento "intellectual" e
practic del conferentia.
PROQUE?
In mi vision, un conferentia international de interlingua debe esser
interessante, non solmente amusante. Le participantes debe haber le
opportunitate (ma non le obligation) de apprender qualcosa -- de partir
del conferentia con nove cognoscentias e nove ideas.
Traditionalmente, le conferentias de interlingua consisteva
principalmente de activismo pro interlingua, excursiones touristic, e
amusamento. Il habeva anque discursos interessante de interesse general,
ma lor numero rarmente esseva grande.
Io es convincite que un programma interessante e de qualitate solide,
presentate al publico in tempore adequate (i.e. ANTE le apertura del
registration!) pote attraher un numero plus grande de participantes al
conferentia.
Omne altere conferentia seriose functiona de tal maniera, e io crede que
nos pote emular lor successo.
E proque un commission de membros pro realisar tote isto? Io pensa que
un conferentia plus "aperte" es plus attractive pro le participantes.
Cata uno ha qualcosa a contribuer e si on ha le opportunitate pro
contribuer durante tote le anno, le conferentia vive durante tote le
anno, e le spirito e motivation pro interlingua vive, e on non lo
oblidara quando on retorna a casa.
QUE DEBE ESSER FACITE?
Pro saper isto, nos attende *vostre* ideas! ;-) Ma ecce alcun exemplos
de lo que, in mi opinion, certemente debe esser facite:
* Determinar un thema pro le conferentia. Omne altere conferentia
seriose ha un thema, un curte phrase o un sol parola que describe in
terminos multo general le subjecto del conferentia.
Exemplos de possibile themas (io es certe que istes non es le melior
possibile!):
- "Utilisar interlingua in le mundo"
- "Excellentia in communication international"
- "Le futuro de interlingua"
- "Le identitate interlinguista"
etc. (esque vos ha ideas? Scribe los!)
* Cercar discursos, presentationes e seminarios. Pro facilitar isto, nos
deberea:
- invitar propositiones del publico, e acceptar le propositiones que
succede a presentar se como solide e relevante additiones al conferentia;
- activemente cercar personas con particular cognoscentias,
qualificationes o ideas que nos vermente vole haber, e invitar les a
venir al conferentia pro pronunciar un discurso o conducer un seminario
interactive;
- extender nostre attention etiam a foras de nostre movimento. Il ha
multe personas e organisationes non-interlinguista ma con solide
qualificationes, interessante ideas e/o relevante conceptos pro nostre
communitate de interlingua. Tal ideas poterea informar e inspirar nostre
effortios pro diffunder interlingua.
* Organisar le sessiones acceptate in un horario coherente e ben coordinate.
* Naturalmente le preferentias del presentatores del discursos debe
esser includite in iste considerationes, e pro isto, un persona debera
occupar se del communication con le presentatores, ante e durante le
conferentia.
E multo plus. Isto es un grande labor. Le conferentia habera loco in
novem menses, dunque, pro esser in bon tempore, nos pote assumer que nos
ha sex menses (un medie anno) pro facer tote isto, si nos comencia
immediatemente.
SIA SERIOSE, MA NON TROPPO :-)
Nota ben: isto es un projecto seriose. Nos cerca personas con ideas e
con le motivation de exequer los. Nonobstante, si tu accepta iste
invitation, tu non essera sol; tu habera sempre le structura e le appoio
del commission pro adjutar te a laborar. Nos vole operar in un spirito
consensual e collaborative. Dunque, non senti te intimidate! Omne
contribution, non importa quanto micre, es benvenite.
COMO PARTICIPAR?
Iste commission communica per un lista de e-posta similar a INTERLNG. Si
tu es membro del lista, tu es membro del commission.
Ecce le tres passos pro devenir membro del Commission del Programma:
1. Va al adresse:
http://lists.interlingua.com/listinfo.cgi/conferentia-programma-interlingua.com
e inscribe te al lista. Scribe tu adresse electronic, tu nomine, e
clicca sur "Abona".
2. Scribe me separatemente al adresse [log in to unmask]
con un curte explication de lo que tu pote contribuer.
3. Io te inviara le regulas e conditiones de participation (p.ex. tu
debe promitter de tractar le discussiones interne como confidential). Tu
debera declarar te de accordo con istes.
Tu non essera inscribite immediatemente; io debe approbar tu abonamento.
Isto es pro assecurar que solmente le personas con sincer interesse se
face membros del commission. Ante de approbar te, io attendera tu
message personal introductive al adresse supramentionate.
CONCLUSION
Le commissiones de membros representa un opportunitate nove e unic de
contribuer al organisation del Conferentia International de Interlingua.
Le Commission del Programma es solmente le prime commission. Alteres se
annunciara plus tarde (p.ex. le commission de publicitate, pro coordinar
le promotion del conferentia).
Intertanto, si tu ha un interesse in contribuer al programma formal e
practic del conferentia, per favor face audir de te le plus tosto possibile!
Gratias,
- Martijn (vice-secretario del UMI, presidente del Commission del Programma)
--
Pro leger le archivos e pro modificar o cancellar le subscription:
http://listserv.icors.org/archives/interlng.html
|
