Toto torte:
SELECTION MONSTRA TOTE SU DEFICIENTIAS
(Antonio Carlos Pimentel)
(Jornal Liberal, Belém, Pará, Brasil, Lunedi, 13 de julio de 1998.)

PARIS -- Il pareva mesmo un jochetto de compatres. Le Selection
Brasilian decideva monstrar tote su deficientias justo in le partita
final del Cuppa del Mundo, heri, contra Francia, in le Stade de
France, a Saint-Denis. Como si pro agradar le dominos del casa,
perfecte hostes, le brasilianos relinqueva le soniate pentacampionato
e dava al franceses le placer de commemorar, ante 80 mille personas
intra le stadio e milliones al stratas de Paris, su prime titulo
mundial. Un victoria juste del selection que succedeva transversar
tote le competition sin sentir le gusto del defaita e que habeva in le
hora decisive le homine correcte in le loco correcte: Zinedine Zidane.

Sera necessari multe explicationes pro tentar monstrar al populo
brasilian lo que se passava con le Selection. Necuno allegara que
jocatores como Roberto Carlos, Ronaldo, Rivaldo, Bebeto, Dunga,
Aldair, César Sampaio, al fin, totes experiente e accostumate a
decisiones, sentiva le pression del assistentia. Mancava, de facto, le
sanguine que in altere jocos importante del Mundial -- como al quartas
e semi-finales, contra Danmark e Hollanda -- habeva movite un equipa
de multe talentos individual ma limitate in su organization tactic.

Le final del Cuppa passava sin su major idolo. Ronaldo non entrava in
campo, vamos dicer lo assi. In veritate, ille quasi non entra de
facto. Usque minutas ante le initio del partita Edmundo appareva como
titular in le lista divulgate per Zagallo al arbitro e al dirigentes
de FIFA. Se sapeva, depost, que le attaccante titular brasilian habeva
debite submitter se a un examine de urgentia, in un clinica de Paris,
pro verificar le conditiones de su genu. Le confirmation de Ronaldo
serviva a nihil. Le "phenomeno" dispareva in campo. Assi como
dispareva, mysteriosemente, Bebeto, Rivaldo, Cafu e Roberto Carlos.
Brasil era altere equipa.

Como si isto non bastava, le trainator Aimé Jacquet tirava del capello
le formula que occideva le previsibile jocatas offensive del
Selection. Como alteres ja habeva facite -- Daniel Passarella in le
joco amical contra Argentina, in le stadio Maracanã, e Egil Olsen, pro
Norvegia --, le trainator francese annullava le ascensiones del
laterales de Brasil e plantava le defensa super Ronaldo. Se perdeva,
assi, tote le lanciamentos de Dunga pro le invasion de Cafu e Roberto
Carlos per le punctas e moriva le unic jocata offensive planate per
Zagallo. Pro pejorar, le defensa sempre questionate e plen de fiascos
permitteva duo goals de bolla stoppate [dead ball?]. Inacceptabile pro
qui vole esser campion del mundo.

Le substitutiones de Leonardo, pessime desde le initio, per Denílson,
e de César Sampaio per Edmundo, ultime idea offensive de Zagallo, solo
monstrava que le Selection partiva al despero in cerca del titulo que
escappava de su pedes. Non functionava. Edmundo de novo se confundeva
con le bolla e Denílson solo grattava le gazon in le puncta sinistre.
Per le medio, Bebeto, Ronaldo e Rivaldo continuava extinguite. Mal
major: le capitano Dunga non sudava le fronte iste vice.

Le Cuppa remane in Paris per quatro annos. Congratulationes al
franceses. E Brasil parti verso un renovation necessari. Le victoria
de Francia, indiscutibile, premia le organization e disciplina del
equipa de Aimé Jacquet. Le defaita maltracta le corde del brasilianos,
ma lassa lectiones, como tote frustrationes in le vita, pro que le
errores de hodie non se repete. Solo assi le football brasilian pote
recuperar le brillantia de altere tempores.
--
   ENSJO*: EMERSON JOSÉ SILVEIRA DA COSTA
  E-mail : [log in to unmask] [<Ø>] Brasil!
Homepage : http://www.nautilus.com.br/~ensjo/
Telephono: (091) 231-5740 // +55 91 231 5740
 UIN ICQ : 713833   [* "sj" pronunciate "sh"]

INTERLINGUA - lingua auxiliar international
    Info : http://www.interlingua.com
 Grammar : http://www.nautilus.com.br/~ensjo/interlingua/english.html