Io es felice de apprender de Horatio que in Argentina, usque ora, le A2K
problema non ha levate se.  Nonobstante, ben que le mesme es ver in le
Statos Unite, nostre gerentes governamental dice que solmente 10% del
problema ha essite probate per le evenimentos desde 1 januario 2000.  Le
major proba va esser quando le affaires commercial comencia lor activitates
a lunedi.  Ben que le bancos e varie agentias governamental ha superate le
problema, il va esser ancora casos que le cercas ha omittite in discoperir,
e possibilemente illes non va monstrar se pro multe menses si non un plen
anno.  Mais il me pare que tal problemas essera tractabile.  Le problema es
le parve affaires commercial que non habeva le moneta pro corriger le
problema, o que non habeva le saper facer a tractar lo.  Mi proprie filio
secunde, Roberto, qui ha un parve commercio de tonder le gazones. usa un
Macintosh computator in su commercio.  Iste computator es libere del
problema de A2K in su construction.  Mais isto non esseva ver del programma
Quickbooks Pro que ille usa pro mantener su contos.  Solmente per accidente
io legeva que iste programma pro le Macintosh non ancora esseva libere del
A2K problema. Alora un notitia pareva in le tela transterrestre que le
compania que publica Quickbooks habeva un melioration del programma que
tracta le problema.  Io directmente ordinava le nove melioration del
programma pro mi filio.  Mais io opina que in multe casos similar
commerciantes parve como ille non va saper de tal problemas.  In certe casos
le costo de facer le meliorationes va venir a un tempore inopportune pro
certe commerciantes.  Il va haber milles de tal casos, io opina.

Stan Mulaik