Quando io habeva 8 annos, Zog, le cano de mi familia, un animal
multe amante e amabile (nominate pro le ultime rege de Albania),
qui habeva quasi 14 annos, moriva de cancere oral. Un familia
con que (il era planate) ille visitarea le campania in Columbia
County (in le stato de Nova York, quasi 200 kilometros al norte
del citate de N.Y.) ha viagiate con ille tote le distantia, e al fin del
viage ha vidite que le ore de Zog sanguificava. Illes ha retornate al
citate immediatemente, Zog ha vadite al veterinario sin io vider lo,
e io nunca ha vidite ille de novo.

Nos ha vidite, quando illes ha retornate e explicate le situation, que
il era guttas de sangue immediatemente extra de nostre appartamento,
entre le porta e le elevator (e etiam in le elevator); ma il era necun
sangue in le appartamento mesme. In le momento in le qual Zog ha
quitate le casa (nunquam pro retornar), le sanguinar ha comenciate.
E io, le infante de octo annos, ha examinate le guttas, le evidentia final
de mi car can. Isto, naturalmnete, non es un memoria bon, e io non ha
pensate de illo in le 29 annos postea.

Hodie, mi catto Tolstoy (un animal multe amante e amabile, tanto pacific
como le autor pro qui ille es nominate), era obviemente infelice. Ma,
quando io ha vidite guttas de sangue ubi ille ha ambulate, io era in un
panico complete. Con le adjuta de mi amica Mary, io ha cercate un
veterinario aperte hodie (domingo) e ha trovate uno que era solmente
un kilometro distante de mi casa. Le problema era que le tracto urinari
de Tolstoy era stoppate; gratias al veterinario le tracto nunc es aperte e,
in duo dias, mi catto retornara del veterinario a mi (e su) casa.

Ma tote le dia, usque iste momento, io ha vidite in mi mente, con un
claritate vivide, le image del guttas de sangue de Zog, extra del
porta del appartamento ubi mi parentes vive, le casa in le qual io
viveva como un infante--un image del qual io non ha pensate in plus
que un quartiero de un seculo. Il es extraordinari como le mente
human funciona...

-Julio