Iste nocte passate le region circa Atlanta esseva assaltate per un serie de
tempestas tornadic que passava per le region metropolitan de Atlanta inter
10 p.m. e 2 a.m.  A 12 a.m. un reporto del television indicava un tornado
esseva observate in le contato al su west del nostre, movente in un direction
al nord est a circa  96 km/h.  Tosto nos audiva le sirenas de advertimento
e io e mi sposa ha movite nos con nostre radio portabile, telephono cellular,
e lampas de tasca a un camera in le basamento de  nostre casa.  Le parasitos
del radio causate per le fulmine esseva quasi continue e il esseva difficile
intender le advertimentos del bureau meteorologic.  Nos nos imaginava
como le brittanos in le blitz.

Plure tornados passava per le region durante le nocte.  Un tornado esseva
reportate in le citate de Marietta.  Io non ancora sape le natura del
destruction.  Un altere passava inter nos e nostre filio in Smyrna al
sud est de nos.  Un tertie passava per le suburbo de Dunwoody per le
vicino del apartamento in que mi altere filio e su sposa habitava ante
mover se a Canton, Ga.  Mi filio ancora servi le apartamentos in ille
vicino con su affaire de tonder le gazones.  Su patre affin ancora
administra iste gruppo de apartamentos, e ille appelleva a mi filio a
venir adjutar le in assessar le destruction.  Su sposa nos telephonava
a dicer que ille apartamentos esseva damnate como esseva alteros in le
vicinitate.  Illa anque diceva que le ecclesia a que illes pertineva
esseva in le centro del area que esseva assaltate per un tornado. Illa
non sapeva exactemente le extento del damnos a illo, mais illa credeva
que il esseva multo probabile que illo recipeva damno.  Un tertie
tornado assaltava un contato al est de iste altere, lassante multe
casas con lor tectos avellite e alcun casas mesmo demolite.  Alcun del
casas demolite esseva nove e grande.

Le distribution del electricitate es rupte in multe locos del region
metropolitan. Le debris del destruction es in tote partes e blocca le
circulation de automobiles. Multe casas es damnate o demolite.  Mais
iste destruction es solmente in specific areas del region metropolitan.

Io vadeva a mi lecto solmente post tres horas post medienocte quando le
final tempesta ha passate.

Isto es un del periculos de habitar iste region in april.

Stan Mulaik