Al hora actual il ha le saison del tornado, que existe in le Statos Unite
inter april e maio quando grande massas de aere frigide e calde se
collide, generante grande tempestas in le regiones central del pais.
Al comenciamento del ultime septimana un grande tempesta in Oklahoma
e Kansas ha generate un tornado de fortia F5, le plus grande, que
passava super le habitantes, destruente casas de bricca como si illos
esseva de papiro.  Plus que 1000 casas esseva totalmente destruite
per le cyclon, que un equipa de reporters de television ha filmate.
Le nubilo infundibulate de ventas torquente esseva circa .8 km in
diametro e esseva accompaniate per un secunde tornado plus parve detra
lo.  Le ventas in le grande tornado esseva 400 km/h, bastante pro
facer un ramo de un arbo passa facilemente per un muro de bricca. Il
esseva sufficiente pro totalmente scopar un casa de su fundation.

Le mesme tempesta lentemente se moveva al est.  A jovedi, il habeva
causate tornados in Alabama e Tennessee al west e nord de mi stato,
Georgia.

Venerdi io esseva in mi bureau a Georgia Tech, quando a 16.42 horas
io recipeva un appello de telephono. Il esseva mi sposa.  Illa esseva
in le subterraneo. "Il ha un advertimento de tornado circa aqui!"
Illa diceva que le sirenas sonava in le distantia con le advertimento.
Nostre nove radio que recipe annunciamentos e advertimentos del
Servicio Meteorologic habeva sonava le alarma simultaneemente.  Le
position del tornado esseva proxime a nostre casa.  Io la instrueva a
vader sub le tabulo in mi officina in le subterraneo.  Illa partiva
del linea telephonic.  Io immediatemente cercava le tela transterrestre
per mi computator al bureau pro informationes super illo.  Ver a dicer,
il habeva un advertimento de un tornado vidite in le vicinitate de mi
casa.  Io cercava le images de radar del Servicio Meteorologic, e
illo monstrava un linea de tempestas que extendeva diagonalmente
del sudwest al nordest in le vicinitate de mi casa.  Alcun momentos
anxie plus tarde io telephonava mi sposa.  Illa esseva secur e ok.
Mais illa remaneva in le subterraneo pro un altere 15 minutas usque
le fin del advertimento.  Alora alteros sequeva.  Illa avisava que
io remane al bureau pro un altere hora ante comenciar mi viage a
casa.  Io lo faceva, mais quando io arrivava non lontan de mi casa
mais ancora super le superstrata, io incontrava un forte tempesta de
pluvia, que gradualmente se diminueva como io veniva a mi casa, que
ancora existeva. Necun tornado.

Evidentemente, secundo le novas del television, le tornado de que mi
sposa habeva fugite in ir al subterraneo, habeva toccava le terra
solmente in duo contatos al sud e west de nos, mais illo habeva
sequite un sentiero al nordest que passava proxime a mi casa e verso
le contato ubi mi filio secunde, Roberto, habita in Canton, Georgia.
Fortunatemente le tornado habeva retornate se al celo, e esseva
solmente visibile per le radar del Servicio Meteorologic.

Isto es le saison de anxietate con respecto al tempestas.

Le tornados pare mover secundo le linea de un fronte de tempestas.
Aqui le tempestas se moveva del nordwest al sudest in un linea
que extendeva trans plure statos (Alabama, Georgia, Tennessee).
Quando le tornados se forma in le linea, illes move secundo le
linea del sudwest al nordest.

Ha Europa le tornados?

Stan Mulaik