Kjell,
   Con respecto al rolo del ecclesia in le vita quotidien in Svedia e le
Statos Unite, il pare que, paradoxicamente, quando le stato lo financia,
illo occide le fide.  Le ecclesias in le Statos Unite es multo influential
in le vitas del populo. (Io mesme non attende le ecclesia, mi sentimentos
religiose essente quasi exotic e asiatic e confortabile mesmo con le
agnosticismo--Io es le Mundo, como dice le hindu, o "il ha necun ego,"
dice le buddhista. Nonobstante io respecta "bon" religion e le bon illo
da al vitas de gentes qui participa in illo seriosemente). Le ecclesia
io describeva, Le Secunde Ecclesia Baptista de Ponce de Leon (strata),
es del Baptistas.  Illos es multo "conservative", e quasi literal in lor
theologia, que non es pro me un major problema, in tanto que illes non
essaya a determina le responsas a questiones scientific per un literal
interpretation del Biblia (que infortunatemente, multe Baptistas lo face).
Io es multo anxie per le attitudines "negative" infra le Baptistas.  Illes
pare multo preoccupate per prohiber isto o ille comportamento, e sovente
es inclinate a interferer in le vitas de alteres per appoiar le passage de
leges contra tal comportamento (p.e. le homosexualitate, pornographia,
le biber de biberages alcoholic, etc. etc.).  Nonobstante, io esseva
impressionate quando al intermission in le spectaculo, un pastor
appareva a benvenita le audientia, e ille diceva que le pastor regular
non poteva apparer a iste tempore proque ille necessita le cura de su
filio malade, durante que su sposa face alcun altere cosa).  "Io es un
membro del personal pastoral del ecclesia," ille diceva.  E io esseva
impressionate per su bon maniera de parlar--melior que le pastor regular--
e alora le cryptic remarca, que ille emphase lo que es positive in
contrasto con alteres qui emphase le negative e le prohibitiones.  Hmmm...
Possibilemente le Baptistas pote esser salvate de lor tendentias idolatrose
(tractante lo que es concrete como le preoccupation ultime, p.e. le
literalismo), io diceva a me.  Le pastor regular appareva al fin del
spectaculo.


Le ecclesia de mi filio parve (fil. parv. e non fil. mag.) es le ecclesia
de su sposa, Le Assemblea de Deo.  Iste ecclesia es socialmente parlante,
de basse medie classe, anque fundamentalista, como le Baptistas, mais lor
attitudine es differente, toto "positive". Quando nostre granfilia esseva
baptizate e presentate al ecclesia, como le granparentes, nos appareva
pro participar in le servicio.  Le servicio es multo informal.  De facto
io non esseva exactemente secur quando le servicio commenciava.  Io
rememora le pastor e su sposa al fronte del congregation parlante con le
varie membros in le fronte rango de sedes, alora le pastor faceva un passo
retro e diceva, "Amicos, sia que nos commencia?" E le musica commenciava.
Le emphase del sermon esseva super como Deo va adjutar vos in vostre vita.
E membros del congregation esseva invitate a venir al fronte pro reciper
le ama e appoio de alteres durante crises in lor vitas e a describer lor
problemas.  Tosto tote le congregation esseva involvite in le servicio,
parlante approbation, appoio.  E le cantos esseva cantate con enthusiasmo.
I audiva necun parolas de prohibition; il habeva solmente le pardona de
Deo.  Io a me pensava, ben que literal e pro isto in periculo del
idolatria (per adorar le concrete e finite), illes esseva salvate per le
spirito e amor de Deo, que pervade tote cosas.

Stan Mulaik