Car amico Stan e alteres,
Stan, tu me pone un question super le festa de Sancte Nicolaus: "Esque le
servitor del sancto es un ver negro?" No, ille es un puero o puera
nederlandese que on ha nigrate. Secundo le legenda le espiscopo
esseva le episcopo de Myra, qui ha vivite, io crede, in le quarte seculo.
On suppone que in su temporee ille esseva accompaniate de un servitor
nigre, qui esseva un ver negro.
Le celebration del festa ha disveloppate diverse tractos typicamente
nederlandese. P.e., cata uno "sape" que durante le estate le episcopo habita
Espania, e que in le prime dies de decembre ille arriva per nave in
Nederland. Anque iste anno nos ha vidite al television le "arrivata de
sancte Nicolaus" in le porto de Enkhuizen.
Le "credentia" vole que in le noctes ante le 5 de decembre ille se move
super su cavallo blanc e accompaniate de su servitor diligente e fidel super
le tectos del casas. Per le caminos ille e su servitor jecta su presentes in le
casas, ubi le infantes ha ponite lor scarpa(s) reimplite de grande carottas
destinate al cavallo fidel de sancte Nicolaus.
Le servitor del sancto que on appella "Zwarte Piet" (= Petro Nigre)
es providite de duo cosas inseparabile, le grande sacco con le presentes pro
le infantes con bon comportamento, e un fasce de parve brancas, un
instrumento que servi, eventualmente, pro punir infantes con mal
comportamento, un punition que in realitate eveni nunquam.
In le prime dies de decembre on organisa ubique in le pais incontros con
le sancto, in magazines, in salas, in casas de familia. Alora sancte Nicolaus
consulta un grandissime libro per le qual ille es informate del bon o mal
comportamento del infantes presente. On canta cantos traditional super
sancte Nicolaus. On mangia chocolate e marzapan e anque le manatas de
nuces de pan de specie que "Zwarte Piet" jecta inter le infantes.
Il ha plure burlas que circula super le festa. Pro exemplo, durante le festa
in su casa un parve puero face iste remarca: "Il es curiose que sancte
Nicolaus porta le mesme scarpas que mi papa."
Le festa de sancte Nicolaus esseva sempre le plus grande festa, ma in le
ultime annos illo suffre le concurrentia del festa de Natal con su
"patre Natal". Io deplora iste evolution, nam io senti iste ultime festa como
un imitation alco artificial del festa multo plus authentic de sancte Nicolaus.
Salutes amical de Piet
|
