Como nos omnes sape, le numero de interessatos es multo insufficiente.
Al plus qualque milles que es quasi nihil in comparation con le circulos
esperantista - un mille vices plus numerose. In Polonia il habeva, io
suspecta, non plus que dece o dece-cinque personas. Io pote lamentar pro
le morto prematur de Kazimierz Gebarski qui me habeva monstrate
Interlingua e qui jam ante dece-cinque annos utilisava su ancian
computator (non-PC) por labores linguistic. Nunc ille poterea usar le
Internet e facer un labor multo plus efficace.

Il es absolutemente impossibile publicar in mi pais, sin un sponsor ric,
libros o magazines super Interlingua. Dunque io me concentra
completemente al Rete. Gratias al adresse popular filo.pl io ha le
chance al minus monstrar le lingua a milles personas qui visita iste
sito (dedicate al anglese, germano, latino etc.). Le prime scopo es
attraher c. 200-300 personas qui ama linguas in general e tal
"curiositates".

Un importante premissa es non exhortar le gente al uso active. Io
promove Interlingua como tresor lexicographic e desira successivemente
interessar instructores de linguas in scholas. Dunque io lo promove como
un lingua latinoide, como instrumento propedeutic. On debe dunque
laborar lente- e precisemente, durante qualque annos. Le rolo de
Interlingua como medio de communication active es nunc multo minus
importante.

Le vortal linguistic Filo.pl invia a omne interessatos "parola per
e-posta". Io anque prepara un collection de parolas in Interlingua. Illo
va continer affixos e themas supin, con exemplos - un per die, durante
un o duo annos. Isto sera plus utile del puncto de vista educative que
singule parolas sin contexto. Al initio a 200 o 300 personas, postea, io
spera, multo plus.

Post al minus duo annos preparatori il sera possibile popularisar le
lingua in modo plus professional et al plus grande scala. Nunc on debe
investir su labor e tempore.

E finalmente: io dice solmente de mi proprie activitates. Io representa
necuno e ha nulle monopolio. In cata momento un persona incognite pote
facer alique toto non attendite - isto es foras me :-)

Pawel Wimmer
http://www.interlingua.filo.pl