>Lo fede es la pro relievar le beltate!
>
>Nunquam ha io sentite me tanto in accordo con te!
>
>Cellus

Iste matino, antea io accompaniava mi sposa al compras del septimana.
Solitemente nos frequenta le grande supermercatos for del citate, un
occasion pro admirar le campania, sin haber le preoccupation de conducer le
automobile que, in iste casos, es illo de mi sposa.
E cata uno conduce le sue!
Le salices necessita ancora de uno, duo dies e totevia illos ha jam lor
gemmas que es jam aperite. Pro isto uno intravide un verde multo tenue que
explodera deman o al maximo postdeman.
Illo que es in plen florition es le mimosas. Lor flores ha solmente alcun
dies. Un delecto de jalne ancora in le campania denudate o con le verde del
grano que se ha justo liberate del hiberno.
Retornate in citate, e parcate le auto, nos ha facite un belle promenada de
circa un hora e medie. Treviso in le sol cecante del primavera, un placer
unic. Le personas se incontra e stationa a salutar se con le placer de
gauder se un momento de iste sol.
Iste postmeridie io facera un altere promenada, iste vice in le avenue
alberate que curre pro le sol pedones in illo que era le contraforte del
muras civic (XV seculo). Le avenue ha un duplice filar de castanios de India
(hippocastanieros) e lor characteristica es lor gemmas enorme, que quando se
aperi manifesta un verde de un qualitate unic. In duo dies le avenue sera
totalmente un portico de verde fresc e maestose.
Iste anno io non debe perder iste momento unic.
E le prime papilion? Io debe incontrar le prime papilion.

Forsan deman io ira in ripas al Adriatico, como pro celebrar un rito venetic
propitiatori. Un ver inebrition de aer.

Temperatura superior a 15 grados C.

Mario





_________________________________________________________________
MSN Photos è il metodo più semplice per condividere e stampare le tue foto:
http://photos.msn.it/Support/WorldWide.aspx