TORNADO Occide 12 e Feriva 103 in Tempesta Subite in Nord Georgia

Malgrado lor supercomputatores e un grege de satellites observante le
terra, meteorologos del Servicio National del Tempore in Georgia,
SUA non editionava un advertimento de tornado ante un tornado occisor
colpava Nord Georgia in le Statos Unite venerdi, proque lor instrumentos
non mesmo dava le minor de indication que un potente tornado habeva formate se.

Le tornado veniva a basso al terra circa 6:30 a.m., e le prime advertimento
non esseva editionate usque 6:46. Le tempesta, continente ventos de
a vices 91m/s, occideva al minus 12 gentes, includente plure infantes,
e feriva 103 gentes e falcava un sentiero del destruction trans cinque
contatos del stato de Georgia. Al minus duo personas esseva occidite
e 21 ferite quando un altere tornado applanava le urbe de Stoneville,
Nord Carolina presso le frontiero de Virginia.

Iste tempesta esseva le plus sever a colpar iste region de Georgia desde
le gemine tornados de 1936 que occideva 203 gentes e virtualmente
obliterava le majoritate del edificios circa le placia al centro de
Gainesville, Georgia.

Le tornado habeva formate tanto rapidemente que illo jam ha facite su
destruction quando le instrumentos del Servicio National Meteorologic
ha detecte lo e editionate su advertimentos.

Integre casas esseva demolite, lassante solmente le fundationes plan,
le contentos del casas essente disseminate per le ventos al vicinitate.

Un casa presso un parve laco esseva demolite e su fragmentos e gentes
deposite in le laco.

Un camionero in su camion esseva colpate per le tornado, que jectava
le camion a un schola, demoliente su muros super le camion, occidente
le camionero.

Le governamento de Georgia e le governamento federal ha mobilizate
equipas de adjuta a vader al area destruite. Citatanos private offere
vestimentos e alimentos al gentes del region suffrente de iste colpo.
Multe familias es ora sin alcun de lor proprietate, que ha essite
disseminate in le forestas circa le villages de iste region.

Chris Smith, qui habitava un casa presso un parco de casas mobile in que
septe gentes esseva occidite, esseva immobilizate per le fortia del
tempesta e poteva solmente spectar le destruction.

"Le plus horrificante cosa es quando vos sta al porta de vostre casa
e vos audi le critos e il ha nihil que vos pote facer," illa diceva.

--

Le supra esseva traducite del Atlanta Journal-Constitution del 21 martio 1998.

Le linea de tempestas de que iste tornado ha venite passava super mi casa
circa 5:45 a.m.. Io e mi sposa ha essite eveliate per le tonitro e
fulmine.  Nos ha intendite a eveliar nos in alcun caso a iste tempore pro
vader al casa de mi filio in Smyrna, Georgia ubi mi sposa planava a
respicer nostre granfilia durante que le filia affin esseva in Seattle
a un cliente de su nove compania pro tractar le contos de medicos e mi
filio laborava pro su cliente, un grande magazin in Nashville, Tennessee.
Quando nos arrivava a su casa a 7:30 e tosto telespectava le novas, nos
apprendeva del tornado.  Le station de television jam habeva su helicoptero
super le scena del destruction, e nos poteva vider le casas demolite,
le schola con su muros incavite per le camion, e le arbos, ancora sin
folios, jacente super le terra, extirpate del terra per le fortia del
vento.

Stan Mulaik