Il occurre vice post vice que le signos de traffico in le stratas svedese es
furate per trafficantes de Nederlandia e Germania. Il non se tracta de signos
de maxime celeritate, ma in plus de deceleration.

In Svedia il pote occurrer que un alce se trova in le via de automobiles, e un
collision con un alce non es un occurrentia pictoresc, que le tourista pote
postea narrar a casa, isto es un tragedia que pote finir per le morte del
tourista e su familia, e illes pote postea narrar de lor recordos del
vacantia, sidente in le celo.

Nonobstante le marcas que adverte contra le periculo de collisiones con alces
es sempre e sempre furate. Isto es le mesme maladia como quando touristas fure
in restaurationes. Grandissime era mi pudor quando io, viagiante con altere
parlatores svedese de un lingua auxiliar - non interlingua - in Berlin, e un
del viagiatores habeva furate un cindriera de un restaurante. Io debe dicer
que io regretta que io per mi - in ille tempores - significante eloquentia
german, le salvava de un plus intime cognoscentia con le policia german!

Nonobstante. Car tourista futur! Quando tu senti le desiro approprietar te un
marca de advertimento contra alces, memora que isto pote significar le morte
de un altere persona, e le risco grandissime es que ille altere persona non
necessarimente essera tu grandissime inimico. Il pote esser un de tu amicos.

Un collision con un alce es plus a minos como le collision con un gnu african.
Io non recommenda ni le un ni le altere.

Del resto il ha intreprisas que vende tal marcas multo chique, que tu pote
usar como tabulettas a cafe o pender del pariete.

Un marca furate sur tu pariete pote significar un disaugmentation del
population del mundo! (Ma il ha minus drastic methodos de planification familial!)