Car amicos,

Alicun septimanas post le concurso de patinage de velocitate del Jocos
Olympic Hibernal in Nagano il ha evenite le campionato mundial de tote
le categorias in le superbe patinatorio coperte "Thialf" in Heerenveen,
Nederland. Durante tres dies io ha reguardate con enthusiasmo omne cursas
de iste splendide campionato de patinage, que le television nederlandese ha
diffundite integremente.

Le campionato mundial esseva multo interessante con resultatos excellente.
Li feminas german Gunda Niemann, Claudia Pechstein e Anni Friesinger
ha dominate in le section del feminas. Illas ha ganiate le prime, secunde e
tertie position: EIN, ZWEI, DREI!  Super toto le performance de Gunda
Niemann esseva multo particular, nam illa ha triumphate jam septe vices in
un campionato mundial durante su carriera de dece annos.

In le section del homines ha triumphate le juvene Nederlandese Ids Postma,
qui ha prolongate su campionato del anno passate. Hic le curso del 1500
metros inter le duo nederlandeses Rintje Ritsma e Ids Postma esseva
magnific. In tempores a pena credibile de 1.48.56 e 1.48.55 illes se ha
disputate le victoria. In le classification final Ids Postma esseva sequite de
Rintje Ritsma e le guarda forestal italian Roberto Sighel, anque un patinator
con un longe carriera.

Il es multo regrettabile que in iste hiberno miserabile quasi sin gelo e
totalmente sin nive, nos non ha potite profitar del glacie natural in le canales
e lacos. Tote le sport de patinage, un sport national in Nederland,  esseva
concentrate in le diverse patinatorios con glacie artificial.

Salutes amical de Piet