Car interlinguistas!
Ecce le secunde texto del professor Matti Klinge, que io
traduceva durante nostre vacantias del pascha in nostre
cabana in foreste.
Io crede que le Union Europee (Le parlamento de Finlandia
decidera deman de unir se con UEM - Union Economic e
Monetari - in compania de 10 altere statos) es le grande
chance pro interlingua. Le Union Europee devenira tosto -
probabilemente o forsan - le plus grande unitate economic
in le mundo.
Le U.S.A., nostre plus forte competitor (e partenario), ha
duo avantages importante, un pecunia - dollar, e un lingua,
anglese. Tosto Europa anque habera un pecunia, euro. Ma nos
besonia etiam un lingua commun. Sia illo esser interlingua!
Nos ha duo adversarios principal: Anglese e esperanto.
Anglese pro su profunde infiltration specialmente inter le
juventute europee e esperanto pro su organisationes
avantiate e activitate vivide.
Nostre potente arma es EUROPATRIOTISMO que pala su
fortia e inspiration ab
Le Imperio Roman de Cesares,
Le Imperio Sancte Roman de Carolo Grande,
Le Imperio Sancte Germano-Roman de Carolo V,
Le Union Paneuropee de Otto von Habsburg,
le traditiones latin in multissime scholas e
universitates
in varie partes del Europa, etiam in le Europa
orthodoxe.
Le portator del isto hereditage nobile e fer es interlingua,
le latino moderne. Esperanto a pena pote esser un competitor
seriose, isto es troppo bastardic e sin stilo.
Benque anglese ha attingite tal forte position in Europa e
in le omne mundo io non crede que anglese attingera un
position official in Europa. Io non crede que tal grande
nationes como Germania, Francia e Russia acceptarea anglese
como lingua franca official in Europa. Ma, naturalmente,
nos europeanos debe esser fluente anque in anglese pro
communicar con le mundo extra-europee.
Io pensa que le Union Europee con un pecunia e un lingua
(in addition a un multitude de linguas national
florescente) non es solmente un question idealistic, il es
un question del vita o morte. Pro remaner un unitate
competitive in scientia, industria e economia, con tal
forte unitates como le U.S.A., NAFTA, Japon, tosto anque
China, Europa debe, absolutemente debe pone tote su
cerebros a cooperation, le avantage american in alte
technologia debe devenir rejungite. Alteremente Europa
sserea condemnate a obsoletate, forsan anque al misere
crescente.
In addition a cerebros nos besonia anque fundos de energia
e materia prime. Dunque il es importante pro le Union
Europee haber Russia como un membro del UE o al minus un
cooperation cordial e intime. E.g. Finlandia face
negotiationes con Russia pro isto fines (Le organisation
TACIS). Un alliate natural esserea etiam le grande gruppo
del nationes turc e, forsan, le paises del Maghreb
(Africa del nord-west). Un tal formation non plus esserea
un "Union Europee" ma le Union de Eurasia e Africa (UEA).
E un ideologia commun pro tal formation poterea esser
le hereditage helleno-roman.
Salutante
Allan
================
ROMANUS SUM - II
================
Professor Matti Klinge, Finlandia
Le schola es un establimento que ha como mission a
transmitter a nove generationes le tradition cultural, le
capital de civilisation que ha se accumulate e
crystallizate durante le previe generationes e que on
considera de esser sufficientemente preciose pro preservar.
Con exclamation ROMANUS SUM! io intende un ligatura con le
forma de cultura que es fundamental a nostre parte del
mundo e que edifica se super le antique greco-roman e le
tradition christian.
Discurso super tal ligatura ha naturalmente su message
actual, ma isto non se intenta contra Constantinople e
Sancte Peterburgo. Con me il se intenta primo contra un
illiberal e prejudicial indigena nationalismo, secundo
contra le conception del mundo noneuropee, que es mediate
per le excessivemente forte position del anglese.
Como un ideal accentuate con un slogan le identitate roman
pote naturalmente obtener multe nuances, ma conciper le
roman solmente como imperialismo e militarismo va totevia
troppo longe. Le Imperio Roman era uno de plus formidabile
formationes statal que ha existite; on administrava in su
haga le hereditage del tradition estetic e philosophic grec
e le ideal de un stato civic, reposante super lege, in
longe plus grado que jammais anteriormente o ulteriormente.
Le Imperio Roman durava in le ecclesia roman postea 1453
quando illo habeva succumbite como un stato.
Roma in nulle modo es solmente le urbe Roma e le ulterior
Roma del West: on era etiam in Constantinople romaioi, e a
isto direction existe ja anque hodie un stato con nomine
Romania. Un del plus durabile e importante prestationes
roman, LEX ROMANUM, era codificate in le Roma del Est.
Moscova declarava se plus tarde le "tertie Roma" con le
legimitation que illo, como le anterior Grecia, Roma e
Constantinople, luctava contra le asiaticos pro le
hereditage antique e christianitate. Quando le capital de
Russia plus tarde era removite a Sancte Peterburgo, isto
metropol al Golfo Finlandese deveniva "le quarte Roma".
Ubique esserea plus colonnadas, plus chaussees, un milieu
visual plus inspirate per cultura antique que in Sancte
Peterburgo?
Le tradition de Peterbuirgo es pro Finlandia un parte del
roman, del europee. Le hereditage roman ha attingite nos
anque via altere routes, como le cultura medieval
ecclesiastic e theologic ex Francia e altere lateres, ex
le Imperio Sancte Roman postea le nation german adoptava le
LEX ROMANUM in le principio del era moderne, que anque
duceva le tradition roman plus avante.
In connexion del tradition scholar le roman indica
preponemente a - pro exprimer le cosa concisemente - le
ideal de Horatius e Cicero. Con Horatius servi le forma
maestral del message moral, cuje ingrediente essential es
le effortio a moderatessa, auto-controllo. Con Cicero trova
le ideal del citatano official su maximo, in que on motiva
su position assistite con rhetorica e apporta
recognoscentia pro su obra, omne in objectivo a servir le
plus bon del societate.
|
