Le filio de Hugh Blair ha describite su patre como un co-inventor de
interlingua. Io non vole denegar le contributiones de su patre a
interlingua, mais pro facer le historia exacte, io crede que il es
melior a considerar Blair como un participante in le effortio pro
extraher interlingua del linguas contribuente usate per IALA e pro
provider un grammatica pro illo.

Durante le parte le plus grande del existentia de IALA, Hugh Blair
esseva le assistante special de Sra. Alice Morris. Insimul iste duo
personas ha laborate super varie systemas schematic del grammatica
pro applicar al vocabulario international. Sra. Morris ha volite un
solution schematic similar al esperanto.  In le fin, post le sondages
de 1947, le lingua formulate per Gode e Blair esseva minus schematic
e plus natural. Lor grammatica es unic inter le varie systemas de
linguas auxiliar constructe in tanto que le grammatica non esseva
guidate per alcun conceptos a priori de functiones desirabile pro
un lingua auxiliar. Le principio esseva que on simplemente retene
characteristicas grammatical commun a tote le linguas contribuente
--anglese, francese, italiano, e espaniol/portugese. O conversemente,
on ha eliminate qualcunque characteristica o function es absente in
al minus un de iste linguas.  In iste maniera un principio objective
esseva usate pro formular le grammatica.

Quando Sra. Morris ha morite in 1950, Gode ha usate Blair como su
assistante in compler le dictionario e grammatica in 1951.

In altere respectos il non es exacte a dicer que interlingua esseva
inventate. Interlingua esseva extracte e standardizate a partir del
vocabularios de linguas major europee influentiate per le latino.

Si il ha personas con le responsabilitate major pro le forma de
interlingua, illes esseva E. Clark Stillman e Alexander Gode von
Aesch, qui in 1943 ha scribite un manual pro guidar le effortios de
linguistas in extraher interlingua e standardizar lo de un
collection de linguas contribuente. Stillman esseva le Director de
Recerca Linguistic in aquelle annos.

Stan Mulaik

=====================================================Pro disabonar te del lista, invia un message a
[log in to unmask] con le texto:

  UNSUBSCRIBE INTERLNG

o visita le sito del lista:

  http://maelstrom.stjohns.edu/archives/interlng.html
=====================================================Visita le sito official del Union Mundial pro
Interlingua:

  http://www.interlingua.com/
=====================================================