Ante 100 annos (17 decembre 1903) le Orville e Wilbur
Wright volava lor prime avion a Kitty Hawk, North
Carolina, comenciante le epocha de aviation que
culminava in nostre aviones a reaction e lor servicios
routinari de transporte intercontinental de mercantias
e passageros.

Le patres del fratres Wright habeva un influentia
importantissime in lor carriera de pionieros in le
aviation.  Lor patre faceva cochis.  Lor matre anque
habeva un certe talento mechanic.  Illa fabricava
joculos pro su infantes e apparatos utile pro su
travalios de casa.

In 1878 lor patre comprava pro illes un joculo simile
a un helicoptero, que eveliava in illes un grande
interesse in le mechanica del volo.

Con le adjuta de lor patres illes deveniva expertos
in le reparation de bicylettas, e con le tempore
illes comenciava creder que con lor cognoscimentos,
illes anque poterea fabricar machinas que permitterea
que illes volava con le aves.

Illes comenciava modestemente con cometas de papiro.
Tunc illes progredeva a planatores.  Finalmente
illes applicava un motor e duo helices a un ex lor
planatores, e in 1903 illes volava 35 metros in
12 secundas.  Un pauco plus tarde ille mesme die,
Wilbur volava 260 metros in 59 secundas.

Le jornales de ille dies non prestava multe attention
al prime volos del fratres Wright, e illes retornava
a Dayton, Ohio, pro continuar lor recercas in le
technica del volo.  In 1908 Wilbur demonstrava un
ex lor aviones in Europa in un volo que durava plus
que duo horas.

In 1909 illes comenciava le production commercial
de lor aviones, e tosto multe alteres comenciava
modificar lor designos, e le disveloppamento de
aviones moderne sequeva un curso de evolution
rapidissime comparate al evolution de naves marin.

Le acceleration del taxa de evolution technologic
in general durante le seculo XX deveniva stupefacente,
e il es ben possibile que intra 50 annos le evolution
del informatica producera systemas que rivalisara
le capacitates intellectual del melior cerebros
human.

__________________________________
Do you Yahoo!?
The New Yahoo! Shopping - with improved product search
http://shopping.yahoo.com