Ben que io es un pensionate professor de Georgia Tech, io ancora
insenia un o duo cursos cata anno. Heri, ante un de iste classes,
io ha vadite al Centro de Studentes a lor cafeteria pro lunch, e
in le linea io ha incontrate un vetere collega mie, qui es equalmente
pensionate. Io esseva surprendite vider le. "Insenia tu un curso?"
io ha demandate. "Nonne, io solmente veni aqui pro preoccupar me
con alque." Ben, nos ha trovate un tabulo e ha comenciate le
conversation. Ille es un mathematico e io un psychologo qui insenia
le statistica multivariabile, assi alcun mathematica es commun inter
nos. Io ha demandate lo que ille ha facite depost su pensionamento.
"Io ha essite in China," ille ha respondite. "Io ha multe amicos
a la." "Que face tu in China?" io alora ha demandate. "Io ha
inseniate le mathematica a alcun studentes avantiate, e io ha equalmente
inseniate le mathematica in un schola secundari, mais le pagamento
pro aquello es troppo basse, e io non lo face plus." "Interessante,"
io ha respondite. "Ha tu inseniate tu classes in anglese?" "Si,"
esseva su responsa. In le scholas de China illes insenia le anglese
depost le prime grado quando le studentes ha sex annos. Illes
comprende le anglese ben." "Hmm," io ha pensate a me, "le anglese
es vermente le lingua international."
Si o non le anglese es le lingua international de facto, interlingua
deriva un beneficio del suprematia del anglese, proque, sovente per le
anglese, gentes, como le chineses, apprende multo del vocabulario
international. In iste maniera populos qui non parla un lingua
europee incontra le vocabulario international influentiate per le
latino e le linguas romance.
Ben que in certe respectos le anglese ha un simple grammatica, in
altere respectos illo es multo difficile apprender a causa del
multe idiomas e colloquialismos, e su orthographia irregular (que
esseva regular pro le angleses quando su formas esseva introducite
ante cambios radical in le pronunciation).
Interlingua ancora provide beneficios a illes qui lo apprende. Si
on parla le anglese, on ancora ha necessitate de trovar alcuno qui lo
parla pro communicar con ille/a. In tanto que le numero de parlantes
del linguas romance e le anglese es circa 1 billion gentes,
interlingua pote servir como un ponte a parlantes de iste linguas.
Il es ver que pro certe individuos le communication non es perfecte
mesmo si on usa interlingua, mais in multe respectos le probabilitate
que tu esserea comprendite parlante in interlingua es ancora alte.
Isto es specialmente ver si tu scribe in interlingua. E possibilemente
hodie chineses qui parla e scribe le anglese, pote comprender le
interlingua. Nos debe facer le experimentos.
Totevia, il es ver que con qualcunque lingua, on debe practicar lo
pro devenir un experto in usar lo. E isto es ver del interlingua
equalmente.
Salutes!
Stan Mulaik
=====================================================Pro disabonar te del lista, invia un message a
[log in to unmask] con le texto:
UNSUBSCRIBE INTERLNG
o visita le sito del lista:
http://maelstrom.stjohns.edu/archives/interlng.html
=====================================================Visita le sito official del Union Mundial pro
Interlingua:
http://www.interlingua.com/
=====================================================
|
