Io vole adder al remarcas de Ingvar, que explica le melio que io ha vidite
le rationes proque Sra. Morris ha empleate Andre Martinet, que le
differentia inter Martinét e Gode esseva que Martinet esseva un
academico con reputation, e Gode esseva un Ph.D. qui non laborava
academicamente ultra que al peripheria o temporarimente.  A aquelle
tempore ille esseva  un redactor de obras de referentia pro T. Y.
Crowell Company in Nove York e solmente le director de recerca temporari
de IALA.

Ric Berger habeva evidentia como su position de redactor de Cosmoglotta
(de occidentalistas) que Martinét esseva un sympathico con occidental
qui non voleva facer iste facto public desde circa 1939. Ille remaneva
in contacto private con le occidentalistas durante su empleo a IALA,
e mesmo habeva incontros con le occidentalistas durante viages a Francia
in que ille dava les summarios del labores de IALA.  (Io ha copias del
minutas de un de iste incontros facite per L. M. de Guesnet, qui ha
inviate lo a me). Il esseva indicate que iste reunion esseva secrete.
Particularmente ille habeva timor que Sra. Morris ultimemente facerea
le solution su specie de esperanto basate super le vocabulario international.
Mais quando Martinet habeva partite, e illa esseva mal con le cancere,
illa habeva necuno a compler le projecto altere que Dr. Gode, qui diceva
a  me que ille habeva jam acceptate un position in le facultate a
Universitate Vanderbilt. Sapiente su inclination al interferentia, ille
demandava libertate a compler lo in le maniera per le qual le personal
linguistic habeva laborate per le annos, que ille ha directe e que esseva
le plano de Stillman e Gode de 1943.  Gode esseva un linguista professional
qui credeva que solmente in un totalmente objective methodologia que
registrava le vocabulario international como illo existeva, pote on
producer un producto que haberea le respecto de linguistas professional
e lor appoio in influentiar le politicos e altere personas del
social elite in usar lo.  Io pensa que su vision esseva multo plus
professional que aquello de Martinet in iste respecto.

Stan Mulaik