Le participios son multo utile quando on comencia apprender un lingua
romance. Isto era un grande adjuta pro me quando io conversava con
italianos proque le perfecto in le italiano parlate es normalmente
usate in vice del passato simple.

Compara iste formas:

-----------------------------------------------------------------------------
infinitivo      participio      participio      participio      cognate
                irregular       italian         regular         anglese
-----------------------------------------------------------------------------
accender        accense         'acceso'        accendite       'access'
clauder         clause          'chiuso'        claudite        'clause'
currer          curse           'corso'         currite         'course'
leger           lecte           'letto'         legite          'lecture'
mitter          misse           'messo'         mittite         'mission'
prender         prense          'preso'         prendite        'apprehension'
rumper          rupte           'rotto'         rumpite         'rupture'
scriber         scripte         'scritto'       scribite        'script'
vider           viste           'visto'         vidite          'vista'
-----------------------------------------------------------------------------

Irregularmente,

Greg



STAN MULAIK wrote:
>
> In Paragrapho 97 del Grammatica de Gode e Blair illes ha scripte (io traduce):
>
> Nota: Il ha considerabile numeros de adjectivos verbal del typo _fisse_, _docte_,
> _benedicte_, etc. pertinente al verbos _finder_, _docer_, _benedicer_, etc..
> Lor signification es identic con illo del participios passate usual _findite_,
> _docite_, _benedicite_, etc. in uso adjectival. Adjectivos verbal de iste
> typo poter esser facite pro servir como participios passate in tote functiones
> inclusive de ille de formar tempores composite passate. Le regula governante
> iste puncto es le sequente: Omni verbo que ha un special contracte (=irregular)
> thema derivante listate in le Dictionario pote formar un participio passate
> collateral per adder le suffixo -e a ille thema contracte.
>
> Vide anque Par. 152, ultime unitate.
>
>   Ille es absorbite in su labor  o   Ille es absorpte in su labor
>   Ille ha assumite le nomine de su femina  o  Ille ha assumpte le nomine de
>       su femina.
>   In le campania on non se senti sujicite al haste del vita moderne
> o
>   In le campania on non se senti subjecte al haste del vita moderne.
>
>
> Recentemente in mi excursiones a auxlang io ha sentite un necessitate de
> studiar plus le affixos del latino, e il es clar que un melior systema
> de usar le suffixos in interlingua basate super le latino esserea implementate
> si on recognosceva que le varie affixos es addite al themas del participio
> passate que al verbo.
>
> Un altere pensata.  Si nos va haber libere formation de nove parolas,
> nos debe usar le "irregular" participios passate pro saper los.
>
> Pro le angloparlantes le thema secunde es sovente le forma del verbo anglese
> (non semper mais frequentemente). A. select > Ila. selecte (part. pas.).
> Anglese "to construct" > Ila constructe (part. passate).
>
> "Io ha recepte vostre littera".  recept-ion, recept-ive, recept-aculo
>
> etc.
>
> Io ha extracte le substantia desirate.
>
> Nos ha conducte probas del nove processo.
>
> Vos ha decepte me.
>
> Ben que isto pare a introducer un irregularitate a in le usage de verbos,
> illo anque ha liberate vos per impeller vos a saper iste participios
> (que es sovente adjectivos independente in alcun caso), que vos pote
> usar in le formation de nove parolas, o in comprehender le derivation
> de parolas per le latino.
>
> Stan Mulaik
>
>
>