Car amicos,
Como Janne io ha forte reminiscentias del primavera del anno 1940. Io
habeva 13 annos alora, un puero jam multo interessate in le grande eventos
del tempore. Un mense post le attacco insidiose del germanos contra Danmark
e Norvega le inferno ha erumpite in Europa occidental. Le 10 de maio le
truppas nazista ha invadite nostre pais e attaccate le debile armea
nederlandese. Le 14 de maio, post un bombardamento massive del centro de
Rotterdam, nostre armea ha capitulate. Un periodo de quatro annos plen de
injustitia, de miseria, de suppression, de deportationes e massacras
massive ha comenciate.
Durante le guerra mi odio contra le germanos ha crescite cata die. Quando
un matino in 1941 policieros german ha venite pro arrestar e deportar le
familia judee que esseva nostre vicinos, subito io, un juvene puero, ha
comprendite quanto criminal esseva le nazismo e omne iste homines,
generales e alteres qui lo supportava.
Io me memora que con grande joia io videva le centenas de aviones anglese e
american que transversava regularmente in le aere super mi capite pro
bombardar Germania. Con mi amicos nos habeva parve festas post le grande
disfactos del germanos in Russia e Africa. Le plus grande festa, que ha
durate plure septimanas, esseva post le combattos sanguilente que ha
resultate in le liberation de mi urbe Groningen per truppas canadian le 10
de april de 1945.
Post le guerra io comprendeva gradualmente que mi odio contra le germanos
non poteva durar, e pauco a pauco illo ha diminuite e finalmente disparite,
ben que ancora nunc, post tante annos, il sembla que, forsan
instinctivemente, io evita visitas a Germania. Mi vacantias trans le
frontieras esseva sempre in Belgica, Francia o Anglaterra. Ma io es
consciente del facto que le collaboration del populo german, que es un
altere populo que illo que, con enthusiasmo abjecte, ha supportate Hitler,
es absolutemente necessari pro construer un Europa prospere e libere.
Salutes amical de Piet
http://www.homepages.hetnet.nl/~interlingua/frame/index.htm
|
