[ Ensjo ]
Esque tu percipeva tamben multe accentos differente, Frank? E le tue
ipse, como tu lo reguarda?

Io pensa que nos totes poterea imitar Paolo e disponibilizar un texto in
Interlingua parlate per me in le Web. Forsan in le album de photos de
Jay es un bon opportunitate pro isto, e le texto esserea (un parte de)
nostre presentation personal.

[ frank ]
Oh, si.  Io trovava que cata uno parlava con accentos differente.  Ramiro
habeva le belle sono brasilian, Paolo le italiano, le franceses sonava
typicamente francese, Leland american, Peter Gopsill britannic, Ferenc
hungarian, Aleksandr russe, etc. etc.  Solmente IO parlava sin accento....
bruaha, ha, ha, ha!!!   Le "iridescentia" es ben sicur, io pensa :-))

Seriosemente, quanto a mi proprie accento il es difficile audir se
accuratemente.  Durante le conferentia io recipeva solmente duo
indicationes de alteres super mi accento.  Ingvar remarcava que io NON
habeva le accento typic american.  (Ma ille non diceva qual sorta io in
veritate habeva.)  Frits Goudkuil dava me un complimento quando ille me
diceva que ille poteva me ben comprehender.  Io suppone que mi accento es
un combination de tractos ex le americano, le germano, le brasiliano, e le
italiano.  Iridescentia in action, nonne?

Quanto a exemplos del varie parlatores disponibile sur le rete:  io trova
isto un optime idea.  Nos vole tosto usar le rete pro presentar le
interlingua parlate al mundo.  Florin e Simona organisara tal projectos.
Io pensa que nos debe formar gruppos de personas qui vole travaliar insimul
sur projectos.  Si tu o alteres vole adjutar, nos debe comenciar le
formation de discussiones technic inter membros.  Io preferea si tal
travalios e communicationes occurre per eposta normal pro evitar un grande
carga de litteras technic sur INTERLNG.  Que pensa tu?

-- frank