Car Piet,

Io non es totalmente convincite. Erythema multiforme exsudativum es un
condition con manifestationes similar e, in iste caso al minus con equal
possibilitate como reactio phototoxic o reactio photo-allergic causate per
tetracyclina. Le dignose suggerite ha plure nomines e variantes, inter alia
Syndroma Stevens-Johnson, Syndroma Behcet e alteres.

Un multo plus probabile complication de piccatura de zecca, al minus in le
paises nordic, es le infection del bacterio Borrelia, causante cephalalgia e
arthralgias mesmo que le maladia de Lyme es un problema vexante anque in
Europa. Io spera que tu va recuperar rapidemento.

Salutationes ab Svedia

Sigmund


P. Cleij notava:

> Car amicos,
>
> Heri vespere mi sposa e io ha retornate de un excursion a bicycletta que
> durante quatro dies nos ha facite in le provincia Limburg de mi pais e in
> le region limitrophe de Germania. Ben que le excursion esseva multo
> interessante (e anque un pauco fatigante), io ha revenite heri con mi labie
> inferior dolorosemente inflammate e le visage toto rubie e multo dolorose.
> Anque le dorso de mi manos exponite al sol durante quatro dies esseva rubie
> e multo sensibile.
>
> Que esseva le causa de iste phenomeno disagradabile?
>
> Doxycyclina!
>
> Como Stan Mulaik io usava iste antibiotico que le medico me habeva
> prescribite ante alicun septimanas. Ille me lo habeva prescribite pro
> neutralisar un piccatura de zecca (A. tick), que jam monstrava un pauco le
> famose circulo rubie. Un tal piccatura pote esser periculose pro que illo
> pote causar de maladia de Lyme, un maladia que attacca i.a. le
> articulationes del bracios e gambas e anque le valvulas cardiac. Io sapeva
> que un del effectos collateral del antibiotico poteva esser maculas rubie e
> piccante super le pelle si on se expone al radios solar. In le prime dies
> del tractamento, que durava 14 dies (duo pillulas per die), io essayava de
> evitar de exponer me al sol. Ma quando io constatava que le sol non habeva
> le effecto describite in le notitia explicative del medicamento, io habeva
> oblidate iste effecto possibile, usque al mercuridi passate quando io
> habeva prendite le ultime pillula. Alora le maculas rubie e le dolor se
> monstrava in tote lor fortia. Hodie matino le maculas existe ancora ma le
> dolor ha diminuite.
>
> In le description de su dente Stan usa le parolas "pena" e "penose". Io
> crede que in iste casos le parolas "dolor" e "dolorose" es plus correcte.
>
> Salutes amical de Piet