Car Doctor Stanley Mulaik!

            Vole ben permitter me de diriger vos iste message publicamente aqui in le "lista de discussiones".

            Vos me ha distinguite extraordinarimente per vostre generose e preciose donos. Io los ha recipite ante pauc horas e io simplemente non sapeva lo que io debeva leger primo: le Breve Grammatica de Interlingua, per Stanly A. Mulaik, Ph.D., 3 octobre 2003? O le duo numeros (3 e 4), volumine 5, de "Confluentes"? O forsan le brochure "Ha Le IED Errores? e Altere Investigationes Linguistic de Interlingua", anque de vostre autorato? O, finalmente, le magnific CD? Pro "leger" le CD io ha debite recurrer a un amico mie, mais ille ha arrangiate mi computator adequatemente e ora io pote accessar a tote le files que se contine in le CD e son jam registrate in le computer.

            Il non ha parolas bastante expressive con le quales io poterea regratiar vos. Mais io volerea dicer vos que io trova vostre "Breve Grammatica" utilissime. Illo certo va servir pro assecurar me in plure punctos super le quales io totevia dubitava (o dubita). E al minus mentionar le bellissime traduction a Interlingua del Inferno Canto I per Dante Alighieri, in "Confluentes - octobre novembre decembre 2006.

            Multissime gratias, dunque, pro vostre gentilessa, per me non meritate del toto.

            Cordialmente.

Carlos Alberto Santos
Aracaju - BRASIL

--
Archivos e disabonar: http://listserv.icors.org/archives/INTERLNG.html