Es 'chassar' e 'chassator' parolas de Gode?

Il es difficile de determinar exactemente.  Mais in probabilitate
istos non esseva su parolas proque 'chassar' non es le prototypo
de que I. 'cacciare' e 'cacciatore' o espaniol 'cazar' e 'cazador'
ha essite derivate. Istos e francese ha un prototypo in commun,
que es 'caciar', e indirectemente le anglese ha isto pro su
prototypo.

Inter 1943 e 1946 Dr. Gode esseva le Director de Recerca a IALA,
con le dimission de E. Clark Stillman, le previe Director, qui
ha partite pro laborar pro le Departimento de Stato in le SUA.
In 1946 André Martinet esseva empleate per Sra. Morris pro 
diriger le completion del lingua.  Ille habeva un reputation
plus large que Dr. Gode, e illa ha opinate que le reputation
de Martinet como un linguista eminente poteva adjutar le acceptation
del final interlingua.  Durante que Martinet esseva le nove director,
Dr. Gode esseva retenite a IALA como le chef del linguistas qui
ha laborate depois 1943 - 1946 in constatar le vocabulario
international secundo le principios que Stillman e Gode ha
formulate in lor INTERLINGUISTIC STANDARDIZATION, un manual pro
le disveloppamento de parolas secundo le idea del parola
international basate super le prototypos. Nonobstante, Gode
ancora ha remanite le chef del linguistas, mais Martinet non ha 
favorate iste maniera de disveloppar le lingua auxiliar, e ha 
usate un 'methodologia' personal.  Ric Berger ha reportate que 
in correspondentia con ille, Dr. Gode ha dicite que un vice
quando Martinet ha volate a Paris, le linguistas debeva
inviar le lor solutiones per posta aeree, e Martinet inviarea
su solution retro.  Gode diceva que le linguistas poteva
predicer le solutiones de Martinet in multe casos per
simplemente consultar le solution in le dictionario de
Occidental.  Berger, qui esseva, pro multe annos anterior
a adherer se a interlingua, le redactor de Cosmoglotta,
le periodico official de Occidental, ha scribite que ille ha
cognoscite Martinet como un occidentalista in Europa ante
1939. Mais Martinet non voleva facer isto cognoscite al
publico a causa de su interesses professional como un
linguista academic. Gode diceva que in le fin de 1948
quando ille ha assumite le Directorato de Recerca a IALA,
quando Martinet ha partite a junger le facultate al
Universitate Columbia in Nove York Citate, ille ha discargate
tote le formas de Martinet e ha restaurate aquellos de
su personal basate super le ideas de Stillman e Gode.
Isto es in un documento de Ric Berger.

Io non es certe que ille ha discoperite tote parolas
de Martinet pro discargar los como non esser in accordo
con le regulas de eligibilitate e del standardization
secundo le prototypo.

'chassar' es in le Radicarium (Dictionario) de de Wahl
de Occidental.

Stan

--
Archivos e disabonar: http://listserv.icors.org/archives/INTERLNG.html